Nukissiorfiit pillugu

Nukissiorfiit innaallagissamik, imermik kiassarnermillu tunisassiornermikkut Kalaallit Nunaanni innuttaasut amerlanerpaartaasa pilersugarinissaat akisussaaffigaat. Nukissiorfiit illoqarfiit 17-it nunaqarfiillu 53-it pilersugarivaat.

Nukissiorfiit nukimmik pilersuinerminni nukiit ataavartut annertuumik toqqammavigivaat. Anguniagarlu tassaavoq, nukiit ataavartut periarfissaqarnikkut sumi tamaani atulernissaat, kikkullu tamarmik imermik eqqiluitsumik atuisinnaanissaat.  Nukissiuutinit piuartut pillugit uani atuarit.

Nukissiorfiit suliffeqarfittut namminersortitatut ingerlapput, Namminersorlutik Oqartussat piginnittuullutik. Nukissiorfiit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik attuumassuteqarput.


Nukissiorfiit oqaluttuassartaat

Siornatigut nukissiuutitigut imeqarnermullu suliassat GTO-p, Grønlands Tekniske Organisationip kommunillu isumagisarsimavaat. Tulliuttutigut Nukissiorfiit pilersinneqaleriartuaarnerat tulleriissaaqqavoq:

1950

GTO – Grønlands Tekniske Organisation Statsministeriap ataani Grønlandsdepartementimi immikkoortortaqarfittut pilersinneqarpoq.

1959

Kalaallit Nunaanni imermik pilersuiveqarfiit sanaartornissaat ingerlannissaallu GTO-p akisussaaffigilerpai.

1985

GTO naalagaaffiup iluani suliffeqarfittut atuuffeqalerpoq.

1987

Namminersornerullutik oqartussat GTO-mut piginnittunngorput. GTO-p taaguutini allanngortippaa: Nuna-Tek – Nunatsinni Teknikkikkut Ingerlatsivik.

1990

Namminersornerullutik Oqartussat Teknikkimik pisortaqarfik pilersippaat, Nuna-Tek-iullu akisussaaffii tassunga nuunneqarput. Taamani Nuna-Tek Energi Namminersornerullutik Oqartussat ataanni namminersortitatut suliffeqarfiulerpoq.

1991

Nuna-Tek nutaamik taaguuteqalerpoq; Nukissiorfiit – Grønlands Energiforsyning. Suliffeqarfiup illoqarfinni innaallagissamik, imermik kiassarnermillu pilersuineq akisussaaffigilerpaat.

1994

Illoqarfinni tamani minnerpaamik ataatsimik namminersortumik sarfalerisoqarfiusuni, Nukissiorfiit avaqqullugit atortulersuutinik ikkussuinerit ingerlanneqartut tamarmik taamaatinneqarput.

1998

Nunaqarfinni innaallagissamik imermillu pilersuinerit kommunet akisussaaffigisimasaat, Nukissiorfiit akisussaaffigilerpaat.

2003

Nukissiorfiit Nuummi allaffeqarfimmi Issortarfimmut 3-mi pingaarnertut inissisimalerput.

2006

Grønlands Energiforsyning suliffeqarfiup taaguutaanit peerneqarpoq, taaguutaa tassaaginnalerluni Nukissiorfiit. Suliffeqarfiullu ilisarnaataa pingasunik qalipaatilik, ataasiinnarmik qalipaateqalerpoq, tungujortoq taartunngorluni.