Tasiilami imermit nukissiorneq annertusineqarpoq

Nukissiorfiit Tasiilami imermit nukissiorfik pitsanngorsarneqarpoq aamma misissorpaat illoqarfimmik pilersuisussamit imermit nukissiornermut atortumik allamik pilersitsisoqarsinnaanera.

Tasiilami innaallagissamik pilersuinerup ilarujussua imermit nukissiornermit pivoq – kingullerpaamik 96 %. Taamaattorli Nukissiorfiit anguniarpaat Tasiilamik innaallagissamik aamma kiassaanermik pilersuinerup ataavartumik tunngaveqartumit nukissiamit pilersorneqalernissaa. Taamaattumik Nukissiorfiit sulissutigaat imermit nukissiornermik nioqqutissiornerup annertusineqarnissaa.

Nukissiorfiit ukioq manna Tasiilami imermit nukissiorfik pitsanngorsarpaat. Imermi nukissiorfimmi teknikkikkut atortut allanngortinneqarput taamaalilluni qulakkeerneqarpoq erngup annertunerusumik atorluarneqarsinnaanera. Taamatuttaaq el-patronit ikkussuunneqarput – ilaatigut soorlu atuarfimmi – taamaalilluni imermit nukissiaq sinneqarpat kiassaanermut atorneqarsinnaavoq.

Tamakku saniatigut Nukissiorfinnit pilersaarutigineqarpoq nunami assaasoqarnissaa imermit nukissiorfimmut erngup isumalluutaasup tungaanut imeq annertunerusoq kuussinnaaqqullugu.

Suliniutitut annertunerusutut Nukissiorfiit aallartippaat imermit nukissiorfimmik allamik pilersitsisinnaanermut periarfissat, tassa maannakkut pioreersumut tapertaasussaasumik.