Nukissiorfiit Silasisamut aqqutissiueqataavoq

Kinguaariit tullii silap pissusaanut illersuinissamik ilinniartinneqassapput, inuiaqatigiit silap pissusiata allanngoriartorneranik taassumalu kingunerisinnaasaanik ilisimasaqarnerulerniassammata.

UNICEF meeqqat atuarfii suleqatigalugit silap pissusiata allanngoriartornera pillugu sapaatip akunnerani ataatsimi immikkut sammisaqartitsivoq.

Nittartakkakkut attaveqatigiilluni ataatsimiinnermi siullermi, ataasinngormat ingerlanneqartumi, atuaqatigiiaat 100-t sinneqartut peqataammata, Kalaallit Nunaanni UNICEF-ip nuannaarutigaa. Nuna tamakkerlugu taama ittumik immikkut sammisaqartitsinissaq siulliuvoq.

- Meeqqat silap pissusiataallanngoriatorneranut tunngasunut oqallinnermut
peqataatikkusuppagut. Soorlu Greta Thunberg-ip inuusuttullu allat
eqqaasittaraatigut, inuit peqqutaallutik silap pissusiata allanngoriartornerata
kingunerisaani inuusussaallutik. Taamaammat pingaarutilerujussuuvoq
tusaaneqarlutillu oqalliseqataanissaat, Kalaallit Nunaanni UNICEF-imi suliniutinut
pisortaasoq, Maliina Abelsen, tusagassiorfinnut nalunaaruteqarluni oqarpoq.

Suliffeqarfiit tapersiisut

Immikkut sammisaqartitsinissamut atuartitsissutissat tulluartut suliarineqarnerini suliffeqarfiit arlallit tapersiillutik peqataapput. Pinngortitaleriffik, ilinniartitsisut, ilinniartitsinngorniarfik Nukissiorfiillu atuartitsissutissanik suliaqarsimapput.

- Kinguaariit nutaat suliagut ingerlatilertussaavaat, taamaamaallu Nukissiorfinniit aqqutissiueqataanissarput pingaartipparput. Taamaaliorpugullu sapaatip akunnerani sammisaqarnermi ilisimasatsinnik paasiniaanissaannut periarfissillugit, atuartitsissutissanullu atorneqarsinnaasunik tunniussaqarnitsigut, taamaalilluni piujuaannartitsisumik nukinik atuinissaq atuarfimmi sammineqarsinnaanngorlugu, Nukissiorfimmi nukissiornermik pisortaq, Kaspar Mondrup, oqarpoq.

Atuartut ilinniassavaat:

  • Meeqqat pisinnaatitaaffiinik silap pissusiata allanngoriartorneranut tunngasunik ilisimasaqarnerulerneq
  • Tusaaneqarnissamut isummamillu annissisinnaanermut pisinnaatitaaffiit 
  • Silap pissusiata allanngoriartorneri suuppat, qanoq Issittumi malugineqarpat aammalu nunarsuup sinneranut Issittumilu suut kingunerai? 
  • Kalaallit Nunaata silaannarmut sunniutai suuppat, kikkuulluta qanorlu annikillisaaqataasinnaavugut? 
  • Aaqqinniagassaq aallaavigalugu suliniummik sammisaqarneq: Qanoq ilillluta Kalaallit Nunaanni CO2-mik aniatitsineq annilikkisissinnaavarput? 

Ilinniartitsisut immikkut sammisaqartitsinermi ilinniartitsisuusussat sammisamut tunngatillugu septemberip aallartinnerani seminarertinneqarsimapput.