Nukissiorfiit kiassaanermut akigitinneqartoq appartippaat

Naalakkersuisut akuersissutigaat kiassaanermut akigitinneqartut, 1. septembari 2021 atuutilersumik, appartinneqarnissaat. Akit appartinneqarnerisa atuisartut kisiisa iluaqusinngilai. Mingutsitsinnginnerusumut nuukkiartorneq aammattaaq iluaquserneqassaaq kiisalu naatsorsuutigineqarpoq Nukissiorfiit aningaasaqarneranut tamanna iluaqutaassasoq, tassami ilimagineqarmat sullittakkat kiassaanermut qaminneqarsinnaasumut nuunnissaat akigitinneqartut appartinneqarnerisa kingunerisaanik.

 Akigitinneqartuni nutaani akit appartinneqartussat tassaapput ungasianit kiassaaneq, aalajangersimasumik innaallagissamik kissaaneq aamma innaallagissamik kiassaaneq qaminneqarsinnaasoq (kissarsuummut uuliatortumut atassutilerneqartartoq). Tamanna pivoq Polaroilip aasaaneranut sulinngiffeqarneq sioqqullugu uuliap akianik appartitsinerata kingunerisaanik akit appartinneqarneranni iluanaarutaasoq sullittakkanut toqqaannartumik  ingerlateqqinneqarpoq.    

Kiassaanerup qaminneqarsinnaasup akikillinerata mingutsitsinnginnerusumut unammillersinnaasumik nuukkiartorneq qulakkiissavaa

Nukissiorfiit anguniarpaat tamanut kiassaanermik pilersuinerup privatitut allamik toqqaanissamut unammillersinnaasumik akeqartinniarpaa. Kissarsuutit uuliatortut privatit pisiarisinnaasaat pitsaaninngornerat pissutigalugu innaallagissamik qaminneqarsinnaasumik kiassaanermik tamanut pilersuineq kigaatsumik unammillersinnaanera annikilliartorsimavoq, tassa inunnut kissarsuummik nutaamik nutaaliaasumillu pisisimasunut.    

- Nuannaarutigaarput Naalakkersuisut kiassaanermut akigitinneqartunik appartitsiniarlutik aalajangersimanerat. Tamatuma kingunerisaanik kissarsuummik uuliatortumik privatimik kiassaanermut taarsiunneqarsinnaasoq Nukissiorfinnit kiassaaneq akikitsoq, orniginartoq aamma piujuaannartitsisoq neqeroorutigisinnaalerpaat. Neriuutigaarput sullittakkatta amerlasuut maluginiassagaat innaallagissamik kiassaanermut qaminneqarsinnaasumut akigititavut appasinnerusut, taamaalillutillu mingutsitsinngitsumik aaqqiineq toqqarlugu, Nukissiorfiit pisortaanera Kaspar Mondrup oqarpoq.

 Nukissiorfiit ukiut kingulliit 28-t ingerlanerini pisortatigoortumik annertuumik imermit nukissiorfinnut aningaasaliissuteqartarpoq Nuummut, Tasiilamut, Qaqortumut, Narsamut, Sisimiunut aamma Ilulissanut. Illoqarfinni taakkunani imermit nukissiorfiit ataavartumik nukissiaq nioqqutissiarisaat sapinngisamik atorluarniarlugu, Nukissiorfiit nukissiaq sinneruttoq kiassaanermut qaminneqarsinnaasumut atorneqartussanngorlugu nioqqutigisarpaat. Taamaaliornikkut nukissiamik taassuminnga atorluaanerup inuiaqatigiinnut tamanut iluaqutaavoq aamma Nukissiorfinnit akigitinneqartunut tamanut appasitsitsinermut iluaqutaalluni, tassa innaallagissap, erngup aamma kiassaanerup akiinut.  

Akigitinneqartut nutaat imaalerput:

Kiassaaneq aalajangersimasoq

Kiassaaneq aalajangersimasoq appartinneqarpoq 740 kr.-init/MWh 710 kr.-imut/MWh.

Aalajangersimasumik kiassaanermi pineqarput ungasianit kiassaaneq nalinginnaasoq aamma innaallagissamik kiassaaneq aalajangersimasoq.

Kiassaaneq qaminneqarsinnaasoq

Kiassaaneq aalajangersimasoq appartinneqarpoq 680 kr.-init/MWh 490 kr.-imut/MWh.

Kiassaanermi qaminneqarsinnaasumi pineqarput innaallagissamik kiassaaneq qaminneqarsinnaasoq aamma ungasianit kiassaaneq qaminneqarsinnaasoq.

Kiassaanermik atuisartoq innaallagissamik kiassaanermik qaminneqarsinnaasumik atuisup ukiumut agguaqatigiissitsilluni kiassaanermut aningaasartuutai 3.800 kr.-nit missaannik appassapput, atuisartullu innaallagissamik aalajangersimasumik atuisut (inaallagissamik aamma ungasianik kiassaanermik) ukiumut aningaasartuutaat 600 kr.-nit missaannik appassapput.

Sooruna kiassaaneq qaminneqarsinnaasoq aalajangersimasumik kiassaanermit akikinnerusoq?

 Atuisutut eqqumiigineqarsinnaavoq qaminneqarsinnaasumik kissaanermik pilersorneqarnissaq  toqqaraanni tamatuma akikinnerunera. Paasinissaa ajornanngitsuuvoq aamma tamatumunnga pissutaavoq atuisartoq qaminneqarsinnaasumik innaallagissamik kiassarneqartoq namminneq pisussaaffeqarpoq sillimmateqassalluni, soorlu assersuutigalugu kissarsuummik uuliatortumik. Soorunami atuisartumut kissarsuummik uuliatortumik sillimmateqarnissaq akeqarpoq aamma innaallagiaq kiisalu misissuinermut ilaalu ilanngullugit akeqalaassaaq. Tamakkununnga tamanut aningaasartuutinut akikinnerutitsisoqarpoq tassa qaminneqarsinnaasumik kiassaanermut akigitinneqartup aalajangersimasumik kiassaanerup akianit appasinnerutitsisoqarneratigut. Nukissiorfinnut aammattaaq iluaqutaavoq atuisartup atorsinnaasumik kissarsuuteqarnera tassami pisuni amerlasuuni tamanut kiassaateqarfimmik sillimmateqarnissaq privatimik uuliatortumik kissarsuuteqarnermut sanilliullugu akisunerusarmat. Taamaattumik tamanna atuisartumut aamma Nukissiorfinnut illugiittumik iluaqutaavoq.   

Akiligassiissut pillugu apeqqutissaqaruit 80 11 50-imut sianersinnaavutit.