Kalistap Nukissiaq minguitsoq alapernaaserfigaa

Nunalerinermut, Imminut Pilersornermut, Nukissiuutinut Avatangiisinullu Naalakkersuisoq Kalistat Lund Nukissiorfiit seqerngup qinnguaanik katersuisartui aamma battereeqarfia Igalikumiittoq takuniarpaa

Tamanna pivoq piffissami matumani Kujataaniinnermini savaatillit Narsami ukiumoortumik ataatsimiinnissaannut peqataajartorluni, tamatuma saniatigut savaateqarfiit ilaannut angalaniarluni.
Tamatumunnga atatillugu Nukissiorfiit seqerngup qinnguaanik katersuisartui aamma battereeqarfia Igalikumiittoq takorusuppat. Nukissiorfinni sulisut soorunami Kalistat Lund aamma angalaqatai sisamat tikilluaqquaat takornariartillugillu. 

Angalasut takornariartinneqarnerminni atortut suliarineqarnerat pillugu oqaluttuunneqarput, taanna 2017-imi juulimili ingerlavoq maannakkut aasat arfinilissaat atuutereerluni.
Tamaani seqerngup qinnguaanik katersuisartut 400-t sanileriiaarput tulleriit sisamaallutik sakkortussusiat 104 Kwp (Kilowattpeak aaqq.) taakkununnga atavoq batteriit sarfamik katersisartut katillugit 16 tonsinik oqimaassuseqartut. 


Atortut arlallit suliarineqarput

Kalistat Lund aammattaaq ilisimatinneqarpoq seqerngup qinnguaanik katersuisartut allat pillugit, taakkua nunaqarfinni ataasiakkaani ingerlapput (Ammassivimmi, Eqalugaarsunni, Qeqertarsuatsiaani, Ikerasaarsummi, Qeqertani aamma Kangerlummi).

Nukissiorfiit sulisuisa taamatuttaaq oqaluttuaraat Kujallermi anorisaat 6 kw-mik (Kilowatt, aaqq.) sarfaliorsinnaasoq nunaqarfimmi Eqalugaarsunni aallartinneqalersoq, naatsorsuutigigippullu Ammassivimmi anorisaammik 15 kw-imik ikkussinissarput. 
- Kalistat assut soqutiginnippoq aamma paasiniarlugu seqerngup qinnguaanik katersuisartunik siunissami atuinissarput qanoq pilersaarutigineripput. Kujataaniinnaanngitsoq kisianni aammattaaq illoqarfinni avannaaniittuni, Lars Hoffmeyer oqaluttuarpoq, nangillunilu:
- Taamaattumik Kalistat oqaluttuuppara maannakkorpiaq Nukissiorfiit Uummannami timersortarfissuarmi seqerngup qinnguanik katersuisartunik misilittakkat katersoraat. Tassani atortup paasissutissanik pingaaruteqartunik pissarsitissinnaavaatigut Kalaallit Nunaata avannaani seqerngup qinnguaanik katersuisartut qanoq pitsaatigineranni.
- Suliniutit pissanganartut pillugit Kalistat oqaluttuutissallugu nuannerpoq Igalikumi tikeraarneranut atatillugu, Lars Hoffmeyer oqaluttuarpoq. 



Kalistat Lund Igalikumi seqerngup qinnguaanik katersuisarfimmi.