Tatsinik imeqarfinnik uuttortaaneq

Nukissiorfiit nunami maani tatsinik imeqarfinnik imermik imerneqartussamik salinneqanngitsumik uuttortaanissaq annertooq nutaatut nammineq suliaralugu aallartinnialerpaat  

Sumiiffimmi misissuinerit siulliit augustimi ingerlanneqassapput Sisimiuni aamma Nuummi tatsit misissuiffigineqassallutik.
Uuttortaanerni ingerlanneqartussani paasisat inernerat Nukissiorfinnut pingaaruteqarput, tassami pisariaqartinneqarnerulermat tatsit imeqarfiit qanoq imeqassusiat ilisimassallugu. Kisianni aammattaaq tatsit qanoq iluseqarnerat aamma geometriat ilisimalissallugu.

Tassami ilaatigut eqqoqqissaartumik ilisimaneqartanngilaq nunap timaani naammattumik imeqarnersoq, soorlu assersuutigalugu tatsini imeqarfinni imermik annertunerusumik atuisoqartillugu. Imaluunniit nunap timaani tatsini imeq naammannersoq, kisianni taseq imeqarfik mikivallaarluni, taamaalilluni taseq imeqarfik paqqertarluni soorlu ukiuunerani.  
Taamaattumik isumaqataalluni imaluunniit assortuilluni tunngavilersuinissaq ajornartarpoq, soorlu assersuutigalugu aalisakkerivinni imermik atuineq annertusigaangat.

 Taamaattumik siullermik taseq imeqarfik uuttortarneqassaaq. Ukiuni kingullerni aqqaneq marlunni Nukissiorfiit avataaneersunit sumiiffinni ikittuinnarni taamatut uuttortaatitsisarsimapput. Ilaatigut tamatuma kingunerisaanik imermik salinneqanngitsumik milluaavimmik itinerusumut nuussisoqartarpoq, taamaaliornikkullu ukiup ingerlanerani ilaatigut piffissap naammattumik imissaqartannginnerup pisarnera allanngortinneqartarluni.

Maannakkulli Nukissiorfiit uuttortaanerit namminneq ingerlattussanngorpaat, augustimi tassannga suliaqarneq gummibådi atorlugu tatsinik imermik imerneqartussamik salinneqanngitsumik imalimmik misissuinerit siulliit, tassalu Sisimiuni aamma Nuummi. Soorunami tamanna aquuteralak innaallagiatortoq atorlugu tamanna ingerlanneqassaaq, uulialinnik imeq mingutsinniarnagu.  
- Gummibådimi uuttortaanermut atortoqassaaq. Ekkolodeqarpoq tatsip imaluunniit immap itissusianik uuttortaasartoq. Taassumalu qaavaniippoq GPS eqqorluartumik sumiissusersiut, taava taamaalilluta ilisimassavarput sumerpiaq tatsip itissusia uuttorsimanerlugu, Martin Nauta, Nukissiorfinni suliniummut aqutsisoq oqaluttuarpoq, nangillunilu:
- Atortut taakkua atorlugu GPS-imik sumiissusersiat eqqorluartut tatsip naqqani suummiffik uuttorsimasarput pigilissavagut. Taseq tamakkerlugu sammiveqatigiit malillugit ingerlaarfigissavarput taamaalilluta uagut kissaatigisarput naapertorlugu tamavimmi uuttortarneqassaaq. Suliap pingaaruteqartup aallartinnissaa assut qilanaaraarput, oqarpoq.

 3D
Suliassaq taanna pingaaruteqarpoq. Uuttortaanerit atorlugit sumiiffiit uuttortarneqartut tusintilikkaat tatsip naqqanut tunngasut pigilissavagut, taakkualu atorlugit tatsip naqqa pingasoqiusanngorlugu qarasaasiaq atorlugu titartaganngorsinnaavarput.
Tatsillu naqqa taanna atorlugu Nukissiorfiit tatsip qanoq imartussusia naatsorsorsinnaavaat.
- Initussutsip qanoq ittuunera aammattaaq titartaganngorsinnaavarput taamaalilluni takuneqarsinnaalissaaq imeq qanoq annertutigisoq tatsimit pissarsiarisinnaaneripput, tassa apeqqutaalluni milluaaffiup qanoq ititigisumi inissinneqarsimanera, Martin Nauta oqarluttuarpoq.
Kisitsisit pissarsiarineqartut aammattaaq tatsip naqqata itissusiata qanoq assigiinngitsigineranut tunngasumik titartagaliorsinnaavugut, taanna Nukissiorfiit web gis-ianut ilanngunneqassaaq, taava kikkut tamarmik pisariaqartitsisut tatsip itissusia aamma geometria takusinnaalissavaat.

Nukissiorfiit tatsinik aasat tamaasa sumiiffinni assigiinngitsuni arlalinni uuttortaasarniarpoq, tatsit pisariaqartinneqartut tamarmik uuttortarneqarnissaat tikitsillugu.