Nukissiorfiit aningaasaqarnermut pisortaat nutaaq: Siornatigut Tusassimi naatsorsuuserinermut pisortaq, Johan Danielsen, CFO-tut atorfeqalerpoq

 Nukissiorfiit aningaasaqarnermut pisortaat nutaaq: Siornatigut Tusassimi naatsorsuuserinermut pisortaq, Johan Danielsen, CFO-tut atorfeqalerpoq

Ukiuni amerlasuuni Tusassimi naatsorsuuserinermut pisortatut misilittagalimmik Nukissiorfinni pisortaaqatigiit pitsaasumik piginnaanilimmik ilaqalissapput, Johan Danielsen, 43-nik ukiulik septembarip aallaqqaataani 2023 aningaasaqarnermut pisortatut atorfimmi nutaami sulilerpat.

 

Juaat Tusassimi ukiuni sisamani aningaasanik aqutsinermik aamma ingerlatsinermi aqutsisutut aamma Air Greenlandimi siornatigut ukiuni amerlasuuni financiel controlleritut atorfeqarsimanermigut qajannaatsumik misilittagaqarpoq. Juaap Nukissiorfinni aningaasaqarnermut pisortatut pingaarnertut qitiutissavaa suliffeqarfiup aningaasatigut isumalluutaasa pitsaanerpaamik aqunnissaat, taamaaliornikkut qulakkiissallugu isumannaatsumik pilersuineq aamma nukissiamik mingutsitsinngitsumik ineriartortitsineq. Suliassaq pissanganartoq, kisianni aammattaaq unamminartulik Juaap aallartissallugu pissanganartitaa: 


”Nukissiorfinni aallartinnissara qilanaarivara aamma suleqatit aallussilluartut suleqatigissallugit inuiaqatigiit kalaallit pilersorneqarneranni. Nukissiorfiit suliffeqarfiuvoq Kalaallit Nunaat tamakkerlugu attuumassuteqartoq kiisalu Kalaallit Nunaata mingutsitsinngitsumut ikaarsaariartornerani qitiusumik inissisimasoq. Taamatut ingerlaneq peqataaffigissallugu qilanaarivara.”

Aammattaaq Nukissiorfiit pisortaanerat, Cicilie Senderovitz, Juaap atorfimmini nutaami sulilernissaanut qilanaarpoq:

“Assut iluassaaq Juaat ilanngutsissallugu. Maannakkut tunngavissaqarlualerpugut suliniutinik ingerlanniarlugit piareersakkatsinnik suliaqarnitsinnik ingerlatseqqinnissamut, tassani sanaartornermi suliniutit annertusarneqarnissaannik siumut isiginnippugut, tamakkua siunissami Kalaallit Nunaanni nukissiamik mingutsitsinnginnerusumik pilersuissapput aamma pilersuineq isumannaalluartoq qulakkiissallugu. Juaap piginnaasat ujartorsimasavut pigivai, tassa aningaasaqarnermut tunngatillugu paasinnilluarneq inuttut naleqartitanik pitsaasunik ilallugit.”

Johan Danielsen Nukissiorfiit Nuummi qullersaqarfiani sulissaaq, tassaniipput suliffeqarfiup allaffeqarfia aammattaaq pisortaaqatigiit sinneri tamaaniillutik. Nukissiorfiit inunnik 400 missaannik sulisoqarpoq illoqarfinni 17-ini aamma nunaqarfinni 53-ini agguataarsimasunik.