Nukissiorfiit niuernermik ilinniartut suliaqarnerminni sammivaat

Nukissiorfinni tamatigut nuannaarutigisarparput pilersuineq aamma mingutsitsinngitsumik nukissiaq pillugit eqqartuisarnerput, taamaattumik qaammammi kingullermi Niuernermik Ilinniarfimmi Greenland Business Schoolimi ukiut aappassaanni atuartunut, Nukissiorfiit pillugit sap. akunnerani suliniuteqarneranni, saqqummiussivugut. Atuartut Nukissiorfiit qanoq imermit nukissiorfinnit nukissiap sinneruttup innaallagissamit kiassaanermik nioqquteqarnissamut atorneqartussap siunnersuuteqarnissaminnut suliaqartinneqarput.  

Amerlasuunik pitsaasunik pissanganartunillu siunnersuuteqartoqarpoq, atuartut ilaatigut eqqarsaatigisimavaat Kalaallit Nunaanni datacenterimik siullerpaamik, mingutsitsinngitsumik nukissiamik atuinikkut, sanaartortoqarnissaa. Allat suliniutiminni misissorsimavaat Nukissiorfiit illoqarfinni imermit nukissiuuteqarfiusuni uunnaavissuarnik innaallagiartortunik pisiniartarnerup aamma ikkussuisarnerup pitsaanerulersinnissaat, taamatut innaallagiaq imermik kiassaatitut atorneqarsinnaassammat soorlu assersuutigalugu angerlarsimaffimmi uuliatortumik kissarsuuteqarnermut taarsiullugu. 

Nukissiorfiit atuartut suleqatigilluarsimavaat apersuinerannilu piareersimasimallutik apeqqutit akissuteqarfigalugit. Taamaammat Nukissiorfiit aammattaaq aggersarneqarput suliniutit, tamarmik pitsaasuusut, nalilerneqalermata, aamma suliniut pitsaanerpaaq toqqarneqartussaammat. Ajugaatinneqarpoq suliniut sullitat angerlarsimaffimminni uunnaavissuarnik innaallagiatortunik  ikkussuisoqarnissaannut pisariaqartitaannik aamma kissaataannik misissuinermut tunngasoq.

Sapaatit akunnerat pissanganarluinnartutut ingerlanneqarpoq soqutiginartorpassuarnik siunnersuuteqartoqarluni Nukissiorfiit imermit nukissiorfinnit nukissiaq sinneruttoq qanoq atorluarneqarsinnaaneranut tunngasunik. Neriuppugut atuartut aammattaaq taamatut isumaqartut, nalunaqaarlu ilaat immaqa siunissami Nukissiorfinni sulilersut takusinnaassagivut.