Nuummi oqaluffiit avatangiisinut mingutsitsinngitsumik 2024 kiassarneqalissapput

Juulleriartornerani nuannaarutitta ilagaat suleqatigiinneq pitsaasoq Nukissiorfiit, Allanngutsaaliuinissamut ataatsimiisitaliaq aamma Biskoppeqarfiup ukiakkut 2023 suliarisaat. Mingutsitsinngitsumik nukissamik atuinerulernissamik siunertaqartumik. Isumaqatigiissutigineqaqqammerpoq Hans Egedep Oqaluffia, Annaassisitta Oqaluffia kiisalu Biskoppeqarfik ukioq 2024-mi kiassaatit solaritortut atorunnaarlugit kallerup innitortunik kiassaateqalernissaq. Utoqqarmiut Kangerluarsunnguani imermik nukissiuuteqarfimmi nukissaq sinneruttoq atorlugu.

CO2 127 ton-imik sipaarneq

Oqaluffiit solaritortumik kiassarunnaarlutik kallerup inneranik kiassarneqalerpata, CO2 ukiumut 127 ton sipaarneqassaaq. Tamanna avatangiisinik mingutsitsinngitsumik atuinermut iluaqutaassaaq. Nuummi oqaluffiit taamaalillutik 99,7%-imik CO2mik sipaassapput. Tamanna biskoppip nuannaarutigeqaa: ”Nukissiorfiillu suleqatigiinnitta aallartinnera qujamasuutigeqaara, tassami oqaluffiit avatangiisinut mingutsitsinngitsumik ukioq 2024 kiassarsinnaalissagatsigit. Nuannaarutigaarput pinngortitamik paarseqataagatta, siunissamilu oqaluffiit marluusut avatangiisinik mingutsitsinngitsumik kiassarneqalernerat ilagiinnut pinngortitamullu pitsaasuummat.” oqarpoq Biskop Paneeraq Siegstad Munk.

Naatsersuutigineqarpoq kiassaatit solaritortut kallerup innitortunik taarserneqarnissaat ukioq 2024 kvartalit aappaanni pissasoq, tamanna isumaqarpoq aasaru atuutilersimassasut.

Nukissiorfiit ilungersorlutik Kalaallit Nunaanni avatangiisinik mingutsitsinngitsunik nukissiuuteqarneq suliaraat. Taamaattumik nuannaarutigeqaarput Allanngutsaaliuinissamut ataatsimiisitaliap Biskoppeqarfiullu suleqatigineratigut CO2mik aniatitsineq annikillisarsinnaagatsigu, avatangiisinillu mingutsitsissutaanngitsumik nunatta tunniussinnaasaanik nukissamik pilersuilissagatta. Taamaattumik oqaluffiit kiassarneri pillugit suliat, Nuummi allat suliat assigusut 18-it ilagiinnarpaat. Suliat taakkua ataatsimut katillugit CO2mik aniatitsinermik 2043,3 tonnimik sipaarutaassapput.