Imermik tunisassiorneq

Nunatsinni sumiiffiit ataasiakkaat imermik tunisassioriaasiat assigiinngisitaarpoq, apeqqutaalluni imeq qanoq pissarsiarineqarsinnaanersoq. Erngup pissarsiarineqarsinnaasup annertussusaa, siallertarneranik nittaattarneranik, tatsit kuuillu inissisimaffiinik taakkulu qanoq ungasitsigineranik tunngaveqarluni assigiinngisitaarpoq.

Tunisassioriaatsit assigiinngitsut

Nukissiorfiit pingasoqiusamik imermik tunisassioriaaseqarput:

1. Imeq tatsineersoq kuunneersorlu: Sumiiffinni amerlanerni tatsit erngat imertut imigassatut atorneqartarpoq, imeq nunap iluatigoortoq atorneqarnani.
2. Immap ernga tarajuiagaq: Nunaqarfiit ilaanni allatut periarfissaqanngitsumi, immap ernga tarajuiagaq imertut imigassatut passunneqartarpoq. Taamaaliorneq akisuvoq nukissamillu annertuumik atuiffiulluni.
3. Sermeq aatsitaq: Qaanaami ukiukkut sermeq aatsillugu imigassatut suliarineqartarpoq. Tamanna nukissamik annertuumik atuiffiuvoq, taamaaliortarnerlu silaannaap allanngoriartorneranik eqqugaavoq, tassami ukiukkut sermimik aallertarnermi piffissaq ukiumiit ukiumut sivikilliartuinnarami. Taamaammat imermik tunisassioriaaseq tamanna atorunnaarniarlugu Nukissiorfiit periarfissanik allanik ujartuipput.
4. Nunap iluaniit imermik pissarsineq. Nunaqarfimmi Kangerlummi, Qeqertarsuarmiittumi, nunap iluaniit imeq pissarsiarineqartarpoq.
5. Puilasuaqqanit imermik pissarsineq. Qeqertarsuarmi nunaqarfimmilu Igalikumi puilasuaqqaniit imeq pissarsiarineqartarpoq. Tassani imeq, nunap iluani sivisuumik ingerlaarsimasarpoq. Qeqertarsuarmilu imeq pitsaassutsimut immikkut ittumik pitsaanerusarpoq.

Erngup passunneqarnera

Sumiiffinni ataasiakkaani imermik nukiliorfinni aniatitsivinnilu erngup passunneqartarnera assigiinngiiaarpoq, tamanna peqquteqarpoq sumiiffinni ataasiakkaani erngup pitsaassusaa assigiinngiiaarmat.

Ataatsimut isigalugu imeq ”aqitsuuvoq” seernarlunilu, imermullu salitamut assingulluni. Tamannalu nalimmassarniarlugu imeq kalkimik sodamilluunniit akuneqartarpoq. Imeq sandfilter-ikkoortinneqartarpoq, sukujuit piiarniassammata. Imeq qalleq bakteriaqarpoq, tamannalu nalinginnaasuuvoq. Taamaammallu bakteeriaajarneqartariaqarpoq, tamannalu qulliit UV-usut atorlugit ingerlanneqartarpoq, imerluunniit klorimik akuneqartarluni. Ilaatigut periutsit taakku marluk atorlugit bakteeriaajaasoqartarpoq. Klor-imik akoorineq illoqarfinniunerusoq ingerlanneqartarpoq, pisortaniillu akuersinikkut aatsaat pisinnaalluni.