Solcellet aamma solcellenik ikkussineq pillugu paasissutissaq

Solcellet suuppat?

Solcellet siliciumplade-nik ilaqarput, taakku sarfamik jævnstrømimik nioqqutissiorsinnaasarput atortua modul seqernup qinngornerinit eqqorneqaraangat.

Solcellet qanoq atuuttarpat?

Solcellep seqernup qaamarna sarfanngortittarpaat, tassa solcellep toqqaannartumik seqernup qinngorneri pisariaqartinneq ajorpai, illuatungaatigulli seqernup qinngornerisa qaamanera. Tamatuma kinguneranik solcellet aammattaaq ulluni qulisimasuni sarfamik nioqqutissiortarsinnaallutik.

Qanoq iliorluni solcellenit sarfaq illuutigisami innaallagiaqarnermi ikkussukkanut ikkunneqarsinnaava

Solcellet sarfamik jævnstrømimik nioqqutissiortarput, taamaammallu jævnstrøm vekselstrøminngortinneqarluni illuutigisami innaallagissamut ikkussukkani atorneqalertinnagu. Tamanna pisarpoq jævnstrømi inverter-imik taaneqartartukkoortillugu jævnstrømi vekselstrøminngortinneqartarluni. 

Solcelleni iluaqutaasut

Solcellenik atuinermi iluaquterpassuupput:

• Solcellet seqinermit qaamaneq nukissiatut atajuaannartutut atortarpaa.
• Solcellet allatut nukissiamik pissarsiffittut silap pissusianut ajoqutaanngillat ikummatissanit nunap iluaneersunut taartaasutut atorneqarsinnaapput taamaalillutillu mingutsitsinngitsumut ikaarsaariartornermut ilaallutik CO2-millu aniatitsinermi annikillisaaqataallutik.
• Solcellet niuernermi iluaqutaasinnaapput tulluartumik atortumik toqqaagaanni aammattaaq sarfap nioqqutissiarineqarnerani atuilluartuusinnaalluni. 
• Solcellet nutaaliaasut sillimmaserneqarajuttarput ukiuni 25-ni, kisianni ukiuni 30-40-ni atasinnaallutik. Solcelleliortaatini atortuisa ilaat ataasiakkaat ukiut taakku ingerlaneranni taarsersortarnissaat naatsorsuutaasariaqarpoq, tassani pineqarput inverter aamma batteerinut toqqorsivik taamaassinnaalluni. 
• Solcellet illuutigisani illup qaavani sanaartornermut ilanngullugit ikkunneqarsinnaapput, aamma illup saavani imaluunniit qaavani saavaniluunniit ikkunneqarsinnaallutik.
• Solcellet aserfallatsaaliorneqartarnissamik pisariaqartitsivallaanngillat. Taamaallaalli isumassarsiatsialaavoq akuttunngitsumik misissortarnissaat pisariaqarpatalu salinneqartassallutik.
• Solcellenut atortoq batteerinut toqqorsivittalik suli annertunersumik sipaaruteqartitsisinnaapput.
• Solcellenut atortoq aamma solcellenut atortoq batteerinut toqqorsivittalik sarfap atorneqartup ilaanik imminut pilersornissamik ilinnut kinguneqassaaq aamma piffissap ilaatigut innaallagissap aqqutaannit pisariaqartitsinnginnissamik. 
• Solcellenut atortup illit innaallagissamut akiliutit annikillisissavaa.

Solcellenut atortoq kiap ikkussorsinnaavaa?

Kalaallit Nunaanni namminneq illuutillit aamma suliffeqarfiit periarfissaqarput solcellenut atortumik ikkussinissamut. Solcellenut atortumik innaallagissap aqqutaanut ikkussinissamut immikkorluinnaq periuseq malinneqassaaq.

Ikkussinissamut qinnuteqarneq

Ikkussinissap suliarineqalinnginnerani Nukissiorfinnut – Kalaallit Nunaanni nukissiamik pilersuinermik ingerlavimmut – qinnuteqaammik nassiussisoqassaaq. Qinnuteqarnissamut immersugassaq Nukissiorfiit nittartagaanni pissarsiarineqarsinnaavoq.

Nukissiorfiit solcellenut atortumik ikkussinissamut innersuussutai malinneqassapput

Nukissiorfiit innersussummik suliaqarpoq nukissiamik atajuaannartumik soorlu solcellenut atortumik ikkussinissamut malinneqartussamik. Atajuaannartumik nukissiamik (AN) ikkussinissamut ilitsersuut Nukissiorfiit nittartagaanni pissarsiarineqarsinnaavoq. 

Akuersissut, malittarisassat aamma nalinginnaasut

Qinnuteqaatip akuersissutigineqarnerata kingornatigut ikkussineq elinstallatørimik akuerisaasumit malittarisassat aamma nalinginnaasut malillugit pissaaq. Ikkussineq tamatigut Kalaallit Nunaanni Innaallagissiornermut Oqartussaasut piumasaqaatai ilitsersuutaalu eqquutsinneqassapput.

Innaallagissamut uuttuutinik ikkussineq

Nukissiorfiit nukissiamik ataavartumik ikkussinissanut innersuussutaani inassutigineqarpoq solcellenut ikkussorneqartunut uuttutit marluunissaat. Uuttuut siulleq pisisartup Nukissiorfinnit innaallagissamik pisiaminik atuineranik uuttuisarpoq kiisalu uuttuutip aappata innaallagissamik sinneruttumik pisisartumit Nukissiorfinnut nioqqutigineqartup annertussusia uuttortarlugu. Nukissiorfinnut pingaaruteqarpoq innaallagissap Nukissiorfinnit pissarsiarineqartup aamma innaallagissap Nukissiorfinnut nioqqutigineqartup immikkut nalunaarsorneqarnissaat, taamaattumik innaallagissamik uuttuutit marluk immikkut ikkunneqassapput.

Maluginiaqqusat pingaarutillit

Illoqarfinni imermit nukissiorfeqarfiusuni pilersuineq solcellenik ikkussuineq  nalinginnaasumik akuersissutigineqartanngilaq. Tamatumunnga patsisaavoq sumiiffinni taakkunani inuiaqatigiit aningaasaqarneranni sipaarutaasinnaasut anguneqartarmata, tassami illoqarfiit taakkua ataavartumik nukissiaasumik pilersorneqareermata. Tamannarpiaq aammattaaq pissutaavoq Nukissiorfiit innaallagissamit solcellenit nioqqutissiarineqartumik illoqarfinni imermit nukissiorfimmit pilersorneqartuni sarfamik sinneruttumik pisisannginneranut.

Taamaattorli illoqarfinni imermit nukissiorfimmit pilersorneqartuni solcellenik ikkussuinissaq akuerisaavoq, solcellet immikkoortillugu “stand alone” ikkussorneqassapput, Nukissiorfiit innaallagissamut aqqutaanut attavilerneqarnatik. Solcellet taamaattumik ikkussorneqassappata, qulakkeerneqassaaq ikkussuinerup eqqortumik aamma isumannaatsumik ikkussorneqarnissaat, elinstallatøri akuerisaasoq qanimut suleqatigalugu, kiisalu tamatuma saniatigut Innaallagissiornermut Oqartussaasut piumasaqaataat aamma ilitsersuutaat malinneqassapput.

Paasissutissatut iluaqutaasut

Uani takusinnaavatit solcellenik ikkussuinermut maleruaqqusat:

https://nukissiorfiit.gl/media/0a68266f-db29-4385-a6a7-18f8419ec030/Rw2iVw/Produkter/Ans%C3%B8gningskema%20om%20tilslutning%20af%20vedvarende%20energikilde%202024%20maj.pdf

Uani takusinnaavat solcellenik ikkussuinissamut qinnuteqaat immersugassaq:

https://nukissiorfiit.gl/media/d175f13e-2f24-4daa-b775-e2db4cb3511e/IusfHg/docs/salgs%20og%20leveringsbetingelser/DK/Tilslutning%20af%20VE-installation%202024%2002%2026.pdf

Ilitsersuutit allat:

Vejledninger & publikationer – Grønlands Elmyndighed

Solcellenik ikkussuinissamut qinnuteqaat nassiunneqassaaq uunga:

kundeservice@nukissiorfiit.gl