”Bygdepasser kursus modul 2” – imik taallugu Qaqortumi 3.-12. marsi pikkorissaasoqarpoq, sammineqarlutik nunaqarfinni innaallagissiorfinnik ingerlatsinermut tunngasut assigiinngitsut, nunaqarfinni innaallagissiorfinnik nakkutilliisut pikkorissut Immikkoortortaq Kujallermeersut 12-it Immikkoortortaq Nuummeersullu marluk peqataasoralugit.
Ikiueqqaarneq imermik pilersuinerlu
Pikkorissarneq Kalaallit Røde Korsiata najoqqutassiai malillugit ikiueqqaarnissamik ilikkarsimasat qaqeqqilaarnerannik aallarnerneqarpoq, ukiummi marlunngormata ikiueqqaarnermik kingullermik pikkorissaasoqarmat.
Nunaqarfinni Suleqatigiit Aqutsisuat pikkorissaanermik aaqqissuusseqataasoq, Søren Pedersen ima oqarpoq:
- Pikkorissaanermi tulliatut imermik pilersuineq sammineqarpoq suleqativut pikkorissut Nunaqarfinni ingerlatsinermut akisussaasoq Aqqa Tuumarsi Mathiassen, Immikkoortortaq Kujallermi nunaqarfinnut formandi Lars Kruse kiisalu Qeqertarsuup Tunuani Immikkoortortami nunaqarfinnut formandi Villy Themothæussen ilinniartitsisoralugit. Tassani imermik imerneqartussamik kul og sandfilterit aammalu UV filteri atorlugit saliisarneq peqataasunut takutinniarlugu nunaqarfik Eqalugaarsuit tikeraarneqarpoq.
Innaallagissamik pilersuineq
Innaallagissamik pilersuineq sammineqarportaaq, pikkorissaasoralugit Immikkoortortaq Kujallermi sulianik ataqatigiissaarisoq Uvdloriaq Knudsen aamma Immikkoortortaq Kujallermi nunaqarfimmi formandi Hans Mikaelsen. Tassunga atatillugu nunaqarfiit Igaliko Saarlorlu aamma tikeraarneqarput, taakkunani innaallagissiorfinni suliat takutinniarlugit.
Pikkorissarneq suliffimmi avatangiisinut sillimaniarnermullu tunngasunik naggaserneqarpoq Immikkoortortaq Kujallermi erngup nukinga atorlugu nukissiuuteqarnermik suliami aqutsisoq Ulrik Nissen pikkorissaasoralugu.
Pikkorissaanermut pissarsiffiulluartumut peqataasimasut ilinniartitsisullu tamaasa Nukissiorfinniit qutsavigaavut.
