Imeq

Nukissiorfiit ukiut tamaasa Kalaallit Nunaanni imermik imerneqartuusamik 4,5 mio. m³ miss. pilersuisuupput. Imeq tamaat ingerlateqqinneqartartoq imertut imerneqarsinnaasutut taaneqartarpoq – imeq uagut imertagarput aamma angerlarsimaffimmi erruinermut, errorsinermut saliinermullu atorneqartartoq, kiisalu imeq aalisakkanik suliffissuaqarfimmi atorneqartartoq. Erngup tamakkiisup atorneqartartup affaata missaa aalisakkanik suliffissuaqarfinni atorneqartarpoq.  

Imermik illunut tankinik imiisivittalinnut, erngup aqqutaanut pingaarnernut attaveqanngitsunut, pajuttarneq pisartagalittut aaqqissuussaavoq. Aaqqissuussineq tamanna illoqarfinnut 12-inut aamma nunaqarfimmut ataatsimut neqeroorutaavoq sapaatit akunnerannut aalajangersimasumik amerlassusilinnut pajuttoqartarluni. Ullunut imermik pajunnermut atorneqartartunut aqqutissat aningaasartuutinut tulluarsaqqissaarlugit pilersaarusiorneqartarput. Imermik pisartagaqarnissamik isumaqatigiissuteqarfigisamut allannguisoqartillugu kiisalu pisartagallip immikkut imermik pajutseqqinnissamik inniminniinera imaluunniit tankimut uuttuutitaqanngitsumut pajunneq Sullitanut Sullissivimmik ullormik ataatsimik sioqqutsilluni nalunaarutigineqassaaq.       

Imermik pajunnermut akigitinneqartut ukiumut ataasiarluni aaqqiivigineqartarput. Nukissiorfiit aningaasartuutit 50 %-ii akilertarpaat, sullitalli sinneruttut 50 %-t akilertarlugit. Pajunnermut aalajangersimasumik akiliisoqartarpoq, aammattaaq feeriarnermi, peqannginnermi imaluunniit tankip ulikkaaqqanerani pajunnermi imermik immiisoqarfiunngitsumi. Akiligassaqartoqartillugu imermik pajunneq ingerlaannartumik unitsinneqartarpoq. Immikkut pajunneq aamma tankimut uuttuutitaqanngitsumut immiineq nalinginnaasumik imermik pisartaqarnermi aaqqiissutimit akisunerupput.    

Pajunnerup eqqortumik pinissaa qulakkeerniarlugu immiiffissamut aqqutaani akornutissaqartitsisoqassanngilaq, immiiffissaq aputeqaranilu sermeqassanngilaq, aamma umiatsiaaqqat, angallatit imaluunniit allat peerneqassapput imaluunniit erseqqilluinnartumik nalunaarneqassallutik. Arlaatigut ajoqusiisoqassagaluarpat taarsiisoqassanngilaq.  

Nukissiorfiit anguniagaraat imermik maqinneqarsinnaasumik pigisallit sullitat amerlinissaat, imermik pajuttarnerit amerlassusii ikilinissaat, nunaqarfinni imeqarfinnik nutaanik peqalernissaa, erngup isumannaatsuunissaata uppernarsisinneqarnissaata qulakkeerneqarnissaa (DDS) aamma erngup aqqutaat pisoqqat ingerlaavartumik taarserneqartarnissaat.   

Nukissiorfiit Atuisunut Sullissivia aqqutigalugu inniminniisoqarsinnaavoq, imaluunniit mailikkut saaffiginnittoqarsinnaalluni, uunga: kundeservice@nukissiorfiit.gl. 

Nukissiorfiit siunertaraat, Naalakkersuisut nukimmik imermillu pilersuineq pillugu pilersaarutaasa (novembari 2017) angutserlugit sulinissaq. Ukiut tulliuttut immikkut isiginiagassat tassaapput, atuisut imermik kuutseriaannarmik atuisut amerlinissaat, nunaqarfinni imermik nukiliorfinnik pilersitsinissaq, DDS-ip atulernissaa (Dokumenteret drikkevandssikkerhed), kiisalu ruujorit nutaanngilinikut taarsersornissaat.