Ameraliup kangerlua imaatigut angalasunut ulluni 3. -17. augusti 2026 ilanngullugu matuneqarallassaaq, Nukissiorfiit ulluni taakkunani kangerluk ikaarlugu innaallagissap aqqutaanik wirerersuarmik Utoqqarmiut kangerluarsunnguanni erngup nukinganik nukissiorfimmiit Nuummut sarfalersuisumik iluarsartuussilluni suliaqartussaammat.
Suliaqarnermut tunngaviusoq
Ameralik ikaarlugu wirerersuit ikkussat sisamaat Nuummut innaallagissamik pilersuinermi sillimmataasoq 2024-mi ukiukkut anorersuallarmat ajoquserneqarpoq. Wirerersuit sinneri ajoquteqalissapata erngup nukinganik nukissiorfik Nuummut innaallagissamik pilersuisinnaajunnaassaaq, Nuummilu innaallagissiorfik dieselimik ingerlateqartoq kisimi naatsorsuutigineqalissalluni.
Taamaammat Nuup innaallagissamik siunissami pilersugaanera isumannaarniarlugu wirerip sillimmataasup nutaap ikkunneqarnissaa pisariaqarpoq.
Ameralik ikaarlugu wirerersuit nunarsuarmi taamatut ikkussat takinersaraat, taamaammallu nunatta avataani suleqatigisat immikkut ilisimasallit suleqatigalugit wirerersuarmik taarsiinissaq suliarujussuuvoq. Suliat assartuinermut sillimaniarnermullu tunngasut peqqutigalugit kangerluk ulluni pineqartuni pulaneqarsinnaassanngilaq, iluarsartuussinermi atortunik oqimaatsunik wirerersuarmillu kivitsisoqartussaammat.
Ullut suliaqarfiusussat paasissutissallu
Ullut Ameraliup kangerluanik matoqqatitsiviusussat malinnaaffigilluarneqarnissaat Nukissiorfinniit kaammattuutigissavarput, ullullu suliaqarfissat pillugit pilersaarut nittartakkatsinnut iserlutit uani takusinnaavat:
AMERALIUP KANGERLUANUT ULLUT PULASINNAANNGIFFIIT
Ullut kangerluup pulaneqarsinnaanngiffii allannguuteqarsinnaammata, pilersaarutip alakkallattaarnissaa aamma kaammattuutigissavarput.
Ameraliup matoqqagallarnissaata piniartunut angallattunullu akornusersuisinnaanera eqqumaffigaarput, suliarli ulluni pineqartuni naammassiniarneqassaaq taamaalinerani sila atoruminarnerusarmat suliffeqarfiillu suleqatigisat nunatta avataaneersut ulluni taakkunanerpiaq suliamik ingerlatsisinnaammata.Â
Ameralimmik matoqqatitsigallarnissap kangerlummut pulaniartunut akornusersuisinnaanera ajuusaarutigaarput, angallannermili isumannaallisaaneq siunissamilu innaallagissamik ataavartumik pilersuinissaq pingaaruteqarmata kangerlummik matoqqatitsigallarnissap malinneqarnissaa pingaaruteqarpoq.
