Qiimanermik siaruarterisoq ukiunik 40-nngortorsiorluni nalliuttorsiorpoq

Anda Jakobsen Qaqortumi Nukissiorfinneersoq uani qaammammi pisortat suliffeqarfianni ukiunik 40-nngortorsiorluni nalliuttorsiussaaq.

Anda Jakobsen 1974-imi Qaqortumi amutsivimmi umiarsualiortutut ilinniartunngorluni aallartippoq taamanikkut GTO-qarallarmat, tassanilu 1978-imi naammassilluni. Tamatuma kingornatigut amutsivimmi umiarsualiortut sulilluni ingerlaannarpoq.

Anda Jakobsenip 1979-imi amutsivik qimappaa, atorfinipporlu nunaqarfimmi Saarlumi innaallagissiorfiliornermi ikiortaasussatut. Tamatuma kingornatigulli Nukissiorfimmut attuumassuteqarluni.
– Anda qiimanermik siaruarterisuuvoq suleqatiminillu nuannarineqarluartuulluni, sutigut tamatigut. Isumagittuujuaannarpoq suliassanillu suliaqartarnissaminut qunujanani suliaqartuartartuulluni, Lars Hoffmeyer, Nunap Immikkoortuani Kujataani pisortaq, oqaluttuarpoq.

Anda Jakobsenip ukiunik 40-nngortorsiorluni nalliuttorsiornera ilasseqatigiinnermik malunnartinniarneqassaaq tallimanngorpat septembarip ulluisa 21-anni, tassani Anda Jakobsen ukiuni 40-ni aalajaalluni sulisimaneranut atatillugu diplomimik tunissuteqarfigineqassalluni.
– Neriuppugut ilasseqatigiinnermut Andap ilaqutai aamma suleqatai takussallugit aamma qilanaaraarput Andap nalliuttorsiutiginissaa, Lars Hoffmeyer oqarpoq.

Nukissiorfiit Anda Jakobsen nalliuttorsiorneranik pilluaqquaat suliffeqarfimmilu ukiorpassuarni sulisimaneranik qujassuteqarfigalugu.