Issittumi ingeniørimut ilinniartut pulaartut

Nukissiorfiit ARTEK-imi Sisimiuni ilinniartunik pulaarteqarput, taakkua ulluni makkunani Paasisassarsiorlutik Nuummiipput

Pulaartut 20-t missaanniittut ilaatigut Nina Heilmannimit, Nukissiorfinni praktikertumit, tikilluaqquneqarput. Suliniutinut aqutsisut Martin Lucas Jensen aamma ingerlatsinermi siunnersortit Mads Albæk Sørensen peqatigalugu pulaartut Nukissiorfiit nuna tamakkerlugu pilersuinermik suliaqarneranik oqaluttuunneqarput.

Aamattaaq Nukissiorfiit ataavartumik nukissiorneq pillugu pilersaarutaat aamma suliaat saqqummiunneqarput.

Ilinniartut alapernaapput aamma sammisanut assigiinngitsunut tungasunik apeqquteqartarlutik.
– Ilinniartuulluni pingaaruteqarpoq suliffeqarfinnut pulaartarnissaq. Taakkunani uagut isumassarsisarpugut aamma ilisimasanik pingaaruteqartunik pissarsisinnaalluta. Taamaattumik uanga tulluusimaarpunga Nukissiorfinnut “ilinniartoqatinnut” tikilluaqqusisinnaagama, Nina Heilmann oqarpoq, pilersaarutit malillugit issittumi ingeniøritut ukioq ataaseq qaangiuppat naammassisussaq.