Maanna aalajangerneqarpoq: Nukissiorfiit nunarsuatsinni kangerluk ikaarlugu isorartunerpaamik peqarpoq

Kangerluk Ameralik nunarsuatsinni akimut ikaarlugu isorartunerpaajuvoq. Maanna tamanna Guinness World Recordsimit uppernarsaaserneqarpoq

Utoqqarmiut Kangerluarsunnguanni innaallagissiorfimmit innaallagissap aqqutaa, Ameraliup aamma Kangerluarsunnguup kangerlui napillugit ikaartinneqartut, 2.643 meterinik aamma 5.376 meterinik takissuseqarput. Taannalu kingulleq Ameraliup Kangerlua nunarsuatsinni rekoortiliivoq kangerlunni  akimut ikaarsilluni isorartunerpaatut.

Nukissiorfiit tassunga rekoortiliinermut uppernarsaat pinngisaannarpaat, naak nunarsuatsinni akimut ikaarlugu isorartunerpaatut Ameraliup Kangerlua Guinness World Recordsip nittartagaani allassimagaluartoq.

Taamaattumik Nukissiorfiit Guinness World Records uppernarsaammik Ameraliullu akimut ikaarlugu isorartussusianut uppernarsaammik nassiussipput.

Taamaammat Nukissiorfiit maanna Ameraliup nunarsuatsinni akimut ikaarlugu isorartunerpaajuneranut uppernarsaammik tigusaqarput. Napparussuit Ameraliup kangerluani napparneqarsimasut kujataatungaani 1013 meterisut qatsitsigisumiipput aamma avannaatungaani 444 meterisut qatsitsigisumiillutik. Tamatuma saniatigut pukkinnerpaaq kangerlummi immap qaavaniit 65 meteriulluni.