Sulisut Kullorsuarmut apuupput

Nukissiorfiit sulisui kiisami iluatsitsillutik Kullorsuarmut apuupput. Qularnaarlugu paasivaat erngup aqqutaa kipisimasoq erngarfeqalersimasoq, tamannalu pissutaalluni nunaqarfimmut imermik pilersuineq 2018-imi decembarip ulluisa 27-annili ajornarsimasoq

Sila aamma timmisartumik angalaneq pissutaalluni sulisut atortussanik nassarlutik Kullorsuarmut angalatinniarnerat ajornarsimavoq, kisianni ippassaq sulisut kiisami apuupput. Tikinnerminniilli erngup aqqutaani nunaqarfimmiit tatsip tungaanut misissorlugu aallartipput. Maannakkut qularnaarlugu paasineqarpoq kittorartoortoqarsimasoq erngarfiusumik, taannalu sulisut nivallutik aputaajaallutik qulaarniarnera ingerlappaat ajortissimasut taarserniassagamikkit. Suliamut tamatumunnga atortussat allat atorfissaqartinneqarput Nukissiorfiillu neriutigivaat tulliani nunaqarfimmut helikoptereqarnissaanut ilaallutik tikikkumaartut.

Taamatuttaaq tatsimi erngup pumperneqarfiani erngartoqarnera paasineqarpoq tamanna pissutaalluni erngup aqqutaani imeq qerisoortarluni. Taamaattumik suli oqaatigineqarsinnaanngilaq nunaqarfimmut nalinginnaasumik imermik pilersuilernerup iluarsineqarsinnaanera qaqugu pisinnaanersoq maannakkut oqaatigineqarsinnaanngilaq, tassami erngup aqqutaa sukumiisumik misissorneqaqqaartussaammat.

Tamanna nammineerluni unamminartoqarpoq tassami 35 gradinik issimmat aamma erngup aqqutaa siassimaffimmini apummik itisuumik qallerneqarsimalluni.