Nukissiorfiit atortuinik eqqaassisoqartarpoq

TELE-POST-ip atortumik eqqaanneqartarnerat pillugu annertuumik ajornartorsiortoqartoq atuarneqarsinnaavoq, tamanna aammattaaq Nukissiorfinni ilisimavarput, akuttunngitsumik atortutta eqqaanneqartarnerat misigisaratsigu. Maannakkorpiaq piviusumik Niaqornaarsunni puttasoq aserorlugu eqqaanneqarsimavoq.

Niaqornaarsunni imiisivik tatsimit imeqarfimmiit pumpe aqqutigalugu maannakkut sapaatit akunnerat sinnerlugu pilersorneqanngilaq, puttasup aallaarsaralugu aserorneqarsimanera pissutaalluni.

Pumpe nalinginnaasumik puttasoq iluaqutigalugu puttasartoq tatsip naqqanut kivigami sioqqanik milluaasimavoq tamatumalu kingornatigut aserorluni.

”Assorsuaq uggornarpoq inuit atortutsinnik aallaammik eqqaassisarnerat. Nukissiorfiit inuiaqatigiit tamarmik pigivaat atortutsinnillu aallaallugit aserortinneqarsimasunik iluarsaassinermut aningaasanik atuigaangatta, taava aningaasat atukkavut pilersuinitta ineriartortinneqarneranut atorneqartussaagaluartut atortarpagut.”  Teknikeqarnermut pisortaq Kenneth Nyland oqarpoq.

Imiisivik imermik 200.000 literimik imaqarsinnaasoq Aasianniit imermik angallat attartugaq atorlugu assartorneqartumik pingasoriarluni immerneqarpoq, taamaalillutik Niaqornaasummi innuttaasut imermik pilersorneqarnerminni amigaateqarsimanngillat.

Utaqqiisaagallartumik imermik pilersuineq aaqqinniarlugu aammattaaq suliaqartoqarpoq, tatsimit imeqarfimmit nunaqarfimmit kilometerinik pingasunik ungasissuseqartuminngaanniit.

Assini eqqaassisarnernit allanit assersuutit takukkit: