Nukissiorfinni nukissiornermut pisortaq nutaaq

Ulloq 1. juuni 2020-mi atuutilersutut Nukissiorfinni nukissiornermut pisortatut atorfimmik Kaspar Mondrupip neqeroorfiginissaanik Naalakkersuisut aalajangiussaqarput.

Kaspar Mondrup Ingeniøritut ilinniarsimavoq aamma Teknologii, Niuffaffiit Aaqqissuussinerlu pillugit MBA-tut allagartaqarluni. Atorfeqarneq eqqarsaatigalugu Kaspar Mondrupip suliffigisimavai Sonlinc A/S, HP, Asiaq aamma Thulemi Greenland Contractors, pilersuisarfimmullu pilersuisartutut pisortatut atorfinni arlalinni issiasimalluni. Kaspar Mondrup kingullertigut Sonlinc A/S-imi, qallunaat nukissiuuteqarnermut pilersuinermillu suliarinnittoqarfiannut pilersuisuusoq niuffaffimmilu siuttuusumi, ingerlatsinermut pisortaasimavoq.

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane ima oqaaseqarpoq:

”KasparMondrup nukissiuuteqarnermik pilersuinermillu selskabinut amerlasuunut ukiuni amerlasuuni pilersuisutut atorfeqarsimanini tunngavigalugu nukissiuuteqarnermik pilersuinermillu suliarinnittoqarfimmik annertuunik ilisimasaqarpoq. Naalakkersuisut Nukissiuuteqarnermut imermillu pilersuinermik immikkoortumut pilersaarutaata atulersinnissaanut atatillugu ukiut 15-it sinnerlugit pisortatut misilittakkani tunngavigalugit Kaspar Mondrup nukissiuuteqarnermi pisortatut pingaaruteqartunik suliassaqassaaq. Qilanaarpunga siunissami pitsaasumik suleqatigiinnissatsinnut.”

Nukissiornermut pisortanngortussaq Kaspar Mondrup oqarpoq: “Nukissiuuteqarmut pisortanngornissara, aamma Naalakkersuisut Nukissiuuteqarnermut imermillu pilersuinermik immikkoortumut pilersaarutaata annertuup atulersinnissaa qilanaaraakka.

Nukissiorfiit ilisimavara, aammalu Nuummi / Kalaallit Nunaanni attaveqarfigisakka annertupput, avannaani qeqqanilu alliartorsimagama, tamaani 1972-imit 2019-imut najugaqarlungalu aalajangersimasumik attaveqartuusimavunga.

Burmeister Elteknikimi ilinniartuuninni Kangerluarsunnguami erngup nukinganik nukissiorfiup sanaartornerani peqataavunga, aammalu Asiami silap pissusaa pillugu teknikeritut sinerissami erngup nukinganik nukissiorfiit sinnerisa sanaartornissaat sioqqullugit misissueqqaarinerit naammassinerinut peqataasimavunga.

Taamaattumik nunatsinni nukissiuutinik pilersuinerup nutarsarnissaanut ilnngusseqataanerma nanginnissaanut Nukissiorfinni nukissiuuteqarnermut pisortatut atuuffik tassaassaaq pitsaanerpaatut iliuuseqarfissaq.

Nukissiorfimmi nukissiuuteqarnermut pisortatut atorfimmut qinnuteqartut 24-upput.

Annerusumik paasisaqarumaguit attavigiuk: Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik e-mail-ikkut:isiin@nanoq.gl