Nukissiorfiit erngup nukinganik nukissiorfinni, innaallagissiorfinni dieselitortuni, maannalu suli annikitsumik, seqineq anorilu atorlugit innaallagissamik tunisassiortarput. Assip takutippaa sumiiffinni sorlerni tunisassioriaaseq sorleq atorneqarnersoq. Nukissiorfiit ukiumut sarfaq 340 GWh nioqqutissiarisarpaat.
Erngup nukinganik nukissiorfinni tasinngortat imermik imallik qutsissumi inissisimasarput, nukiliorfillu atsinnerusumi inissisimalluni. Erngup kuunnera ammut takineruppat, innaallagiaq anneq pilersinneqarsinnaavoq. Erngup kuunnerata turbinit ingerlatittarpai, generatorit innaallagissamik pilersuisinnaalersillugit.
Illoqarfinnut nunaqarfinnullu amerlanernut innaallagissamik pilersuineq innaallagissamik pilersuivinniit dieselitortunit tunngaveqarput. Nukik uuliamiittoq dieselmotorip iluani kaavisinneqarnermini allanngortarpoq, motorilu generatorimut atassuserneqarsimasarpoq, taassumalu kaavinnerani innaallagiaq pilersinneqartarluni.
Innaallagissamik pilersuiviit uuliap nukinga atorluarneq ajorpaat. Nukiup 40 %-ia taamaallaat innaallagissatut atorneqartarpoq. Erngulli nukinganik nukissiorfiit pisarnerattut, kiassarneq dieselmotorip pilersitaa atorneqanngitsoq, inissianut imermullu kissatsitsisutut atussagaluaraanni uuliap nukingata atornera 90 %-imut qaqissagaluarpoq.
Kalaallit Nunaat assissaqanngilaq, angissutsimigut aamma pinngortitamigut alianaatsorsuakkut. Nukissiorfiit iluani atorfeqartutut sulianut tunngasutut ataatsimoorfimmi siamasissumi, Kalaallit Nunaanni tamarmi siammaqqasumi ilaalissaatit.
Pilersuisarneq sumiiffikkaani suliaqarfigaarput, aammalu Kalaallit Nunaannik pituttueqataavugut. Nukissiorfiit ilaatut inuiaqatigiinni suliassami pingaarutilimmi ilaalissaatit, tamaanilu siunissamik piujuartitsisuusumik pilersitsinissamut peqataaqataassaatit.
Sulisutta piginnaasaat assigiinngitsut pingaartippagut, aammalu kikkut tamarmik suliassaminnik isumaginnissinnaanissaannut atugassarisat pitsaanerpaat pilersinnissaat alaatsinaaffigalugu.
