Nunatsinni nukissiuutinik pilersuinermi, nutarsaanissaq siunertat pingaarnerit ilagaat. Nukissiuutinik tunisassiornerput siammarterinerpullu eqqarsaatigalugit nutarsagassaqarpugut. Nukissiuutilerinermi teknologi ullumikkut atorneqartartoq, amerlasuutigut issittumut tulluarsagaanngilaq, taamaammallu misiliummik pilersaarutinik aallartitsisariaqartarpugut, taamaaliorutta tunisassiornermi misilittakkavut ilisimasavullu amerlissammata. Misiliutit tamakku qulakkeertarpaat teknoligiit assigiinngitsut nunatsinni atorneqarsinnaanersut, uagullu unammillernartui nammassinnaanerigut.
Misiliummik pilersaarutit akisusinnaasarput, tassami atortut nalinginnaasut, soorlu dieselmotorit, pillugit ilisimasagut, misiliummik pilersaarutinut ilisimasatsinnut naleqqersuussinnaanngilagut. Aningaasartuutilli taakku siunissamut aningaasaliinertut isigisariaqarput.
Misiliutitummi pilersaarutit aqqutigalugit ilisimasavut misilittakkavullu annertusisarput, siunissami nunatta nukissiuutit ataavartut atorlugit pilersorneqarneruleriartornissaanut atorluarsinnaasavut.
Kalaallit Nunaat assissaqanngilaq, angissutsimigut aamma pinngortitamigut alianaatsorsuakkut. Nukissiorfiit iluani atorfeqartutut sulianut tunngasutut ataatsimoorfimmi siamasissumi, Kalaallit Nunaanni tamarmi siammaqqasumi ilaalissaatit.
Pilersuisarneq sumiiffikkaani suliaqarfigaarput, aammalu Kalaallit Nunaannik pituttueqataavugut. Nukissiorfiit ilaatut inuiaqatigiinni suliassami pingaarutilimmi ilaalissaatit, tamaanilu siunissamik piujuartitsisuusumik pilersitsinissamut peqataaqataassaatit.
Sulisutta piginnaasaat assigiinngitsut pingaartippagut, aammalu kikkut tamarmik suliassaminnik isumaginnissinnaanissaannut atugassarisat pitsaanerpaat pilersinnissaat alaatsinaaffigalugu.
