Imeq imerneqartussaq misissorneqarpoq ikuallattup annertuumik pujornerata kingornatigut

Nukissiorfinnit Uummannami erngup imerneqartussap immikkut misissorneqarnera aallartinneqarpoq, tassa Uummannami eqqaavissuarmi eqqakkanik ikuallaanerup kingunerisaanik pujornerujussuanik, pujoq annertooq tatsip imermik imerneqartussamik imiisiviup tungaanut ingerlasimammat.

Maannakkorpiaq nalileruminaappoq imermik isumalluutaasumik mingutsitsisoqarsimanersoq. Nukissiorfiit siusinnerusukkut oqartussaasunut attuumassuteqartunut saaffiginnissimapput, eqqaavissuarmi ikuallassaasarnerup kingunerisaanik erngup imerneqartussap mingutsinneqarsinnaaneranut aarlerinaateqarsinnaaneranut tunngatillugu.

Nukissiorfiit pisup kingunerisaanik imermik misissugassanik qalusititsivoq, tassalu tappiorannartoqarnersoq aamma akuutissanik akoqarnersoq misissorneqassaaq. Tamanna oqartussaasut attuumassuteqartut pisoq pillugu ilisimatinneqareersimasut, qanimut suleqatigalugit ingerlanneqarpoq.

Nukissiorfiit tamatumunnga ilutigitillugu ilisimatitsissutigissavaa suliffeqarfik februaari 2018-imi Avannaata Kommuniata tusarniaassuteqarneranut akissuteqarsimagami, Uummannami nunap qaavani eqqakkanik ikuallaasarnermik immikkut akuersissuteqarnissamut qinnuteqaateqarneranut tunngatillugu. Tassani pingaartinneqarpoq ikuallaasoqassappat, taava tamanna pissutsinik nakkutiginnilluni ingerlanneqartariaqartoq, tatsit imermik imerneqartussamik imeqarfiusut aamma imeqarfiit tikinneqaqqusaannginnerannut killiliussat anorip sammivia taakkununnga sammissanngitsoq.