Imermit nukissiorneq oqaluuserineqarpoq

Ulluni makkunani Nukissiorfiit imermik nukssiornermik sammisaqartitsillutik ataatsimiititsipput. Ataatsimiinnermi suleqatigisartakkallu aamma nunat eqqaamiut peqataatitaqartut, aammattaaq minnerunngitsumik Nukissiorfiit nammineq sulisui ilisimasat aamma misilittakkat pillugit paarlaateqatigiittoqarpoq. Maannakkut aamma siunissami Kalaallit Nunaanni imermit nukissiornermik atuinerup pitsanngorsarnissaanut tamanna tapertaasutut pingaaruteqartutut isigineqarpoq.

Ukiuni aggersuni imermit nukissiorneq ullumikkornit annertunerusumik atorneqalertussaavoq. Taamaattumik Nukissiorfiit sapaatit akunneranni matumani ullut pingasut atorlugit Nuummi qullersaqarfimmi imermit nukissiorneq sammisaralugu ataatsimiititsipput.

Sammisaqarluni ataatsimiinnermi Nukissiorfiit sulisuisa imermit nukissiornermut akisussaaffeqartut, imermit nukissiorfinnit pilersuinerup ineriartortinneqarnissaa aamma annertusineqarnissaa suleqatigisartakkallu avataanersut aamma Savalimmiuni Islandimilu pilersuinermik ingerlatsisut peqatigalugit, oqaluuserivaat.

Nukissiorfinnit sammisaqarfinnit pingaarnerusuni pingasuni imermit nukissiornerup annertunerusumik atorneqalernissaanut periarfissat misissorneqarput: Illoqarfinnut imermit nukissiorfimmik pilersorneqanngitsunut imermit nukissiorfiit anginerusut, imermit nukissiorfinnik pioreersunik annertunerulersitsinissaq aamma nunaqarfinnik pilersuinermut imermit nukissiorfiit nutaat mikinerusut.

Sumiiffinni ataasiakkaani allanik ataavartumik tunngaveqartumik nukissiassamik pissarsiffiusinnaasutut ilimanaatillit aammattaaq misissorneqarput, soorlu tamanna Nukissiuuteqarnermut imermillu pilersuinermik immikkoortumut pilersaarummi allaaserineqartoq.