Utoqqarmiut Kangerluarsunnguani Imermit Nukissiorfimmut innaallagissap aqqutaa pisarneq malillugu misissorneqassaaq

Ullumik makkunani Sarfaannguani innaallagissiorfiup pujoorfianit pujortoq takuneqarsinnaavoq. Tamatumunnga pissutaavoq Nukissiorfiit Utoqqarmiut Kangerluarsunnguani Imermit Nukissiorfimmiit Nuummut inaallagissap aqqutaanik pisarneq malillugu misissuititsinera. Taamaattumik imermit nukissiorfik suliap ingerlanneqarnerani uninngasarpoq tamatumunngalu paarlattaalluni Sarfaannguani innaallagissiorfik illoqarfimmik innaallagissamik pilersuisuuvoq.

Innaallagissap aqqutaanik 56,6 kilometerinik isorartussuseqartumik pisarneq malillugu misissuineq 2018-imi septembarip ulluisa arfineq aappaata tungaanut ingerlanneqarnissaa naatsorsuutigineqarpoq. Misissuineq taamaattoq ukiut tallimakkaarlugit ingerlanneqartarpoq.

Nuummi innuttaasut 2018-imi ulloq oktobarip aallaqqaataani Utoqqarmiut Kangerluarsunnguanni Imermit Innaallagissiorfimmit pilersorneqarnerat ukiuni 25-ni ingerlasimassaaq. Qujanartumik Sarfaannguani innaallagissiorfimmi, imermit nukissiorfimmut sillimmataasumi, uulia atorlugu innaallagissamik pilersuineq qaqutigut atorneqartarpoq. Nukissiorfiit innaallagiaq aamma kiassaaneq Nuummi nioqqutigisartagaata 99 procentia ataavartumik tunngaveqartumik nukissiornermit tunngaveqarpoq.

Misissuinermut atatillugu pilersuinermi persaqusersuutaasinnaasut Nukissiorfiit ajuusaarutigaat.