Akissutit utertinneqarnissaat sivittoqqinneqarpoq 28. februar 2019 – makitsinerlu 15. marts 2019 pissalluni

Apeqqutit illunut tamanut agguaanneqarsimasut akineqartut annikippallaarneri peqqutigalugit matumuuna nalunaarutigissavarput periuserput allanngorlugu TELE-POST illunut tamanut agguaassitinnialeratsigu, akissuteqarnermi allakkat puussai tamatumuuna ilanngunneqarlutik. Tamannalu peqqutigalugu utertitsinissaq 28. februar 2019 kinguartipparput makitsinissarlu 15. marts 2019 kinguartillugu.

Makitsissutigineqartussat 4×500 kr illoqarfinni tamani kiisalu 1×500 kr nunaqarfinni tamani aatsaat 15. marts 2019 pissaaq. Aningaasat eqquisut kontuinut ikineqassapput. Sullitagut maannamut immersukkaminnik tunniussereersimasut toqqaannartumik makitsinissamut peqataatinneqassapput. Inoqutigiinni apeqqutinut akinissaq ataasiaannarluni taamaallaat pisinnaavoq.

Nukissiorfiit nunaqarfinni illoqarfinnilu sullitaminnut pitsaasumik sullissinissartik sulissutigiuarpaat, taamaattumik misissuinermi uani sullitatsinniit tamakkiinerusumik akissuteqaateqartoqarnissaa pisariaqartipparput.

Sullissinitsinni nunaqarfinni illoqarfinnilu suli pitsaanerusumik sullissinissarput pingaarteqaarput taamaattumik uatsinnut pingaaruteqarluinnarpoq paasissallugu sullissinerput innuttaasunit qanoq isumaqarfigineqarnersoq. Taamaattumillu matumani nukiit annertuut sullitatta isumaannik tusarniaanermut atuiffiginiarlugit aaliangerpugut.

Akissutissavit tigunissaat qilanaaraarput mannalu iluatsillugu ukiortaami pilluaqquatsigit qujalluta ukiumut qaangiuttumut.