Ammassivimmi imermik qalaasseqqaaqqusineq unitsinneqarpoq

Misissueqqissaarnerup inernerisa naammaginartut takutippaat erngup minguitsuunera. Tamatuma kinguneraa ukiuni marlunni qalaasseqqaaqqusisarnerup unitsinneqarnera

Ammassivik 2016-imi nutaamik imeqarfittaarpoq. Ajoraluartumilli paasineqarpoq imermit pilersuinermi mingutsitsisoqartoq, tamatumalu sumiinnerata paasiniarnera pisariusimavoq. Suliaq tamanna Kujataani angallannermi assartuinermi unamminartunik pissuteqartumik ajornartorsiuteqartinneqarpoq, tamatuma kingunerisaanik misissugassat arlaleriarlutik Nuummi laboratoriamut nalunaaqquttap inassutigineqartutut akunnerisa 48-t ingerlanerini apuuttarsimannginnerat.

Taamanikkulli Nukissiorfiit sulinermi nalunaaquttap akunnerpassui atortarsimavaat Ammassivimmi, kisianni aammattaaq Nunatsinni illoqarfinni aamma nunaqarfinni allani, erngup imerneqartussap pitsaassusianik qulakkeerinninniarnermut. Taamaaliorluni Nukissiorfiit aammattaaq Ammassivimmi atortuneersunit ingerlatsinermut misilittakkanik katersivoq, kiisalu ilisimaligaq tamanna nunaqarfinni atortussani atulerneqartussani pitsanngorsaanermut atorniarlugu.

Qalaasseqqaaqqusisarneq unitsinneqartoq tassaavoq Kujataani qalaasseqqaaqqusisarnerni kingullerpaaq. Maannakkut qalaasseqqaaqqusisarneq naammassineqanngitsoq ataasiinnanngorpoq, tamannalu Nukissiorfiit iluarsiniarlugu aamma atorunnaarsinniarlugu ilungersorlutik sulissutigaat.