Aserfallatsaaliuinermut atortut pillugit isumasioqatigiinneq

Nukissiorfiit suliffeqarfinnit aggersaavoq aserfallatsaaliuinermut atortut pillugit isumasioqatigiinnissamut aamma ilisimasanik ingerlatitseqqinnissamut tunngatillugu. Isumasioqatigiinneq Nukissiorfiit qullersaqarfianni pingasunngorneq 21. august ingerlanneqarpoq, teknikeqarnermut pisortaq Kenneth Nyland siuttoralugu

Nukissiorfiit aamma Nunatsinni suliffeqarfiit soqutigisaqartut akornanni ilisimasanik aamma misilittakkanik ingerlatitseqqittarnissap ilaatut Nukissiorfiit aserfallatsaaliuinermut atortut pillugit isumasioqatigiinnermik ingerlatseqqammerpoq.

Nukissiorfinnit kissaatigineqarpoq maannakkut atortorisat pitsaanerusunik taarserneqarnissaat, tassa Nukissiorfiit aserfallatsaaliugassaanik tamanik nuna tamakkerlugu aqutsissutitut atorneqarsinnaasumik. Taamaattumik Nukissiorfinnit isumasioqatigiinnissap ingerlanneqarnissaa aallartinneqarpoq, tassani suliffeqarfiit teknikimik suliaqartut allat tulluartut aggersarneqarlutik.

Danmarkimi atueqqittarnermut aamma nukissiornermut suliffeqarfik AffaldPlus atortoqarput aserfallatsaaliuinermut atortunut pisoqqanut taartaalluarsinnaasunik. Taamaattumik taakkua aggersarneqarput misilittakkaminnik ingerlatseqqinnissaat siunertaralugu.

Isumasioqatigiinnermi AffaldPlus-imit sinniisuutitaq Jette Sentow,  atortoq Sertica pillugu oqaluttuarpoq. Atortoq taanna aserfallatsaaliuinermut tamanut atorpaat, taannalu iluaqutigalugu aserfallatsaaliuinermi suliarisartakkatik teknikimut tunngasut tamaasa isumagisarlugit.
– Taakkua misilittagaat Nukissiorfinnut pingaaruteqarput aamma Kalaallit Nunaanni suliffeqarfinnut teknikimik suliaqartunut allanut, imaassinnaavoq tamanna uagut iluaqutigisinnaagipput. Taamaattumik nuannaarutigaara isumasioqatigiinnermut matumunnga maanimiut amerlasuut peqataarusussimanerat, Kenneth Nyland, Nukissiorfinnit teknikeqarnermut pisortaq oqarpoq.

Suliffeqarfiit Royal Arctic Line, Mittarfeqarfiit, Royal Greenland, SANA, SIKUKI Habour, Air Greenland, Kommuneqarfik Sermersooq, Esani aamma Polar Oil ataatsimiinnermi peqataapput, aamma assut apeqquteqarusuttoqarpoq oqallikkusuttoqarlunilu.
– Tamanna tassaavoq Nukissiorfinni aserfallatsaaliuinermut atortup sorliup atorneqarnissaanut paasiniaaneq siulleq. Peqataasut allat isumaqatigiissutigaavut, immitsinnut ilisimateqatigiittarniarluta periarfissanik allanik periarfissaqalissappat aamma ilisimasatsinnik ingerlatitseqqittarniarluta. Kenneth Nyland oqarpoq

Nukissiorfiit siusinnerusukkut pilersuineq pillugu aamma aalisakkanik suliffissuaqarfiit pillugit kiisalu digitalisering pillugu isumasioqatigiinnernik ingerlataqarsimavoq.