Erngup aqqutaani qerisoorsimanerup Kullorsuarmut imermik pilersuisinnaaneq ajornartippaa

Nukissiorfiit Kullorsuarmut erngup aqqutaatigoortumik imermik pilersuinissaminnut suli unamminartoqartitsipput, maannakkut erngup aqqutaani qerisimasoqarpoq mililiussimasumik taassumalu nunaqarfimmut pilersuisinnaaneq ajornartippaa.

Tatsimi imeqarfiusumi pumpi aamma erngup aqqutaata qerinaveersaartinneqarneranut kabeli kiassaat Kullorsuarmut pilersuinerup unittoorneranut aallaqqaataanit ajornartorsiutaasimasut, maannakkut nalinginnaasumik ingerlapput. Ajornartorsiulli alla takkuppoq tassalu erngup aqqutaata ilaani 1200 meterinik isorartussuseqartumi imermik qerisoqarsimavoq mililiussimasumik. Qerilluni mililiussimasup aasserniarnera ajornartorsiortitsivoq.

Taamaattumik Nukissiorfiit ajornartorsiummik aaqqiiniarlutik piviusumik iliuuseqarlutik sulipput, ilimagineqarporlu sapaatit akunnerata tulliata naalernerani tamatuma naammassineqarnissaa. Nukissiorfiit neriupput imermik pilersuineq sapaatit akunneranni 8-mi atuutileqqikkumaartoq.

Tamatuma nallernissaanut Nukissiorfiit tatsip aamma nunaqarfiup akornanni qamuteralaat atorlugit imermik assartuinertik ingerlatiinnassavaat.