Ilulissani kiassaaneq innaallagiatortoq qaminneqarsinnaasoq

Nukissiap mingutitsinngitsup atorneqarnerulernissaanut peqataarusuppit ikummatissallu nunap iluaneersut atornikinnerulerlugit? Taamaaliorsinnaavutit illit kissarsuutinut uuliatortumut kiassaanermut atortumik  innaallagiatortumik ikkussititsiguit – tamarmi aningaasartuutitaqanngitsumik. Ikkussunneqarnera Nukissiorfinnit akilerneqassaaq. Taamaattorli kiassaanermut atortup innaallagiatortup ikkunneqarnissaanut apeqqutaavoq sumiiffimmi najugaqarfigisanni, tamaanna innaallagissap aqqutaasa ajornartinnginneraat.

Tamanna pisinnaavoq Ilulissani imermit nukissiorfik suli nukissiamik mingutsitsinngitsumik immikkut nioqqutissiornissamut periarfissaqarluarmat. Taamaattumik Nukissiorfiit inuiaqatigiinnut iluaqutaasumik inuinnarnut, pisortat illuutaannut anginernut aamma suliffissuaqarfinnut neqeroorutigaat kiassaanermut atortuik innaallagiatortumik ikkussititsinissaq ikummatissanik nunap iluaneersunik atuineq annikillisarniarlugu.

Nukissiorfiit aammattaaq neqeroorutigaat kiassaanermut atortup innaallagiatortumik ikussinissaq aamma ingerlatsinissaq pisinnaasutsit tassaapput 35-600 kW namminneq kissarsuut uuliartortoq sillimmatigineqassaaq. Tamanna ikkussuinernut annertunerusunut inuinnarni aamma pisortat suliffeqarfiutaanni immikkut sammitinneqarpoq. Nukissiorfiit ikkussuinermut aamma allanngortitsinermut atatillugu aningaasartuutit tamaasa akilissavaat.

Innaallagissamik kiassaaneq qaminneqarsinnaasoq sunaava
Ilaqutariit illuanni innaallagissamik kiassaaneq qaminneqarsinnaasoq tassaasinnaavoq kiassaanermut atortoq innaallagiatortoq taanna kissarsuummut uuliatortumut pigineqareersumut atatillugu ikkunneqassaaq. Taamaalisoqarneratigut imermik taamatullu illup iluanik kiassaaneq innaallagissamit imermit nukissiorfimminngaanneersumit nioqqutissiarineqassaaq, taamaaliortoqarpat illit uuliamik atuinissat pinngitsuussavat. Imermit nukissiamik naammattumik imermit nukissiorfimmit peqanngippat kiassaaneq innaallagiatortoq automatiskiusumik qaminneqassaaq kissarsuullu uuliatortoq ikinneqassalluni. Tamannali qaqutiguinnaq pisarpoq.

Illit qanoq iliussavit
Soqutiginnikkuit najukkami immikkoortortaqarfitsinnut saaffiginnissaatit immersugassamillu immersuillutit, tamatuma kingorna suliaq aallartinneqassalluni.

Ikkussuineq ingerlaavartumik ingerlanneqarpoq. Maannakkorpiaq Nukissiorfiit kiassaanermut atortunik innaallagiatortumik 80-90-inik ikkussuineq ingerlappaat, inniminniinerillu tamaasa angumeriniarlugit immikkut sulisoqartitsilluni. Kassaanermut atortunik innaallagiatortunik anginerusunik ikkussuineq ingerlanneqareerpoq aamma sullittakkat amerlanerusut minguitsumik pilersuinermut ingerlaavartumik nuussorpagut.

Nukissiorfiit anguniagaat pingaarneq
Nukissiorfiit anguniagaat pingaarneq tassaavoq nukissiamit tamanit pilersuinerup 2030-imi ataavartumik tunngaveqartumik nukissamik pissarsiffiusinnaasunit pilersorneqalernissaa.