Imaani sikuusumi ”ballet”-erneq kingulleq

Qaanaap eqqaani imaq meterit aappaat avillugu issussusilimmik sikuuvoq, 27 gradillu pallingajallugit issilluni. Ukiorpassuarni siku saatsersoq tassanngaanneersoq imermik pilersuinermut aallaaviusimavoq innuttaasunut 620-t missaanniittunut

Marsip aallartilaarnerani sikumiippugut Qaanaap avataani kilometerit marlussuit illoqarfik ungasitsigalugu. Soorlu ”taamaattussaannaasoq” Qaanaami assartuineq pivoq sikumi biilerluni. Illoqarfinni allani tamanna qaqutigoortoq, ingammillu Nukissiorfiit Nuummi qullersaqarfiannit aallartitaanut misigisaq pissanganartorsiorfioqisoq imaanilu sikuusumi angalasimanngitsumut. Aallartinnanga biilinut ikivunga pissangaammertarlunga, kisianni aalajangersimavunga ullormi suliassaq naammassiniarlugu. Suliassaq tamanna tussunngunalaarpoq, kisianni Qaanaami innuttaasunut sullissinerup aamma imermik pilersuinerup pitsaanerulernissaannik kinguneqartussaasoq qimerloorlugu tamatuma allaanerusumik suliassaqalersippaanga, Nuummi qullersaqarfimmi suliarisartakkannit allaanerusumik.

Ullormut suliassaq uterfigilaariarlara aamma sikumi biilernissaq. Eqqarsaatikkut aalajangerpunga sikumit arlaannik neeqquluttoqarnissaa tusaaniaqqissaartariaqarlugu, sikumi quppaqarnera aqqutaani ”ulorianartut” ilagaat, kisianni biilertup eqqissisaqqissaarniarpaanga siku qajannaatsuusoq. Qungujulanerujussuata paasitippaanga ”annilaanganinnit” quiasuutigilaaraa.

Biilit aallartinnissaannut matuersaat ikkuppaa suliffiup biiliutaannut assakaasuinit sisamanit ingerlanneqartartunut, illoqarfillu qimalerlutigu sissap tungaanut ingerlavugut. Biilerneq iluamik aallartippoq nunap immallu akornanni killiffiatigut, qaanngukkut, tassa immami sikup ataatsimuulerfiani. Nunamiit immami sikumut aallartiffia qatsissuullunilu assut maniippoq, tassami siku tinittarneranit ulittarneranillu tatineqarluni sumi tamaani sikoqarmat. Biilertup biilit taamatut maniitsigisukkut eqqissisimalluni sungiussisimasumillu aquppai, erngerlutalu imaani sikukkuulerluta. Uummatima tillernera malugilluarpara, kisianni imaalerianngitsoq motorvejikkoortutut misigilerpara. Manissukkut aalajangersimasumillu ingerlaarneq. Uummatima tillernera ingerlaannaq nalinginnaaleqqippoq.
– Ippassaq nanoq tamaaniippoq, biilertoq oqariasaarpoq soorlumi tamanna nalinginnaasuuginnartoq, uummatimalu tillernera sukkatseqqippoq, tamatumunngalu ilutigitillugu biilinik aquttup sukkoornera malinnaaviginiarsaralugu biilini radiomi nipilersuut tusarnaajutigalugu.

Minutsit arlaqaaluttut ingerlareerluta tikinniakkatsinnut apuuppugut. Sikumi soqannginnersarujussuaq. Tassani ilaatigut Magsannguaq Imiina takuarput, taanna ukiut 40-t sinnerlugit ilulissanit sikkussaasimasunit nilattartartuuvoq. Ulapippoq, apuukkattali qungujuffigilluarluta.

Isiginnaarparput Magsannguaq ilulissanit tamaaniittunit ikuttaasoq. Tamaani soqannginnersuup takutippaa tamaani illoqarfiup imermik pilersorneqarneranut iluliaarunnera.

Biilinit anillappunga sikumullu tummarlunga. Assiliissutiga tigummiarlugu arriitsumik mianersorlunga gummigedinukarpunga imminut tatigerpasinniarsaralunga. Anersaartornaveersaarpunga oqimaalliniarnanga, neriullunga sikumi nalornerpasillunga ingerlaarninnik malussassanngitsut. Tassanngaannaq paaseriasaarpara kisima sikumiinngitsunga, aammattaarli maskiinarsuit tonsinik arlaqartunik oqimaassusillit gummigedit aamma biilersuit usisaatit sikumiittut.

Gummigedit Magsannguaq Imiinap aqutaasa nivaatartaat ilulissamut sikkussaasimasumut kappupput. Nipiliornerat qoqernarpoq, tunuani usisaassuit sikumik illoqarfimmut assartuinissamut piareeqqapput. Qanorluunniit eqqarsarnerlunga naluara, kisianni assiliissutinnik assiliisaqattaarpunga, soriallanngitsorlu uanga sikumi pississaaqattaarpunga assartuussuit gummigedillu nivaataata akornanni sikumi nipiliortorsuarni. Mianersuinnaavippunga, maskiinarujussuit marluk sikumi balleterneranni akornusersuiniarnanga. Assilisassat piukkunnartut paarlakaatiinnavipput, maskiinarsuit aquttuisalu suliartik pingaartup suliarinerani. Arlaannaalluunniit sikumiinnissaminut annilaanganngilaq. Tassanngaannaq nivaataq nipiliorunnaarpoq, nilallu kingulleq assartuussuarmut ikineqareerpoq. Maanna illoqarfiup tungaanut utilerpoq, tassani nilak tankimut kuineqassallunilu aasserneqassalluni, naggataatigut salinneqassalluni imeqarfimmi.
Balleterneq naammassivoq, gummigedilu illoqarfiup tungaanut malipparput.

Biilinut assakaasuinit sisamaasunit ingerlanneqartartunut utimut ilaallunga sikumi misigisakka eqqarsaatigaakka, aamma Kalaallit Nunaanni imermik pilersuinermi piviusumik akerliusut.

Qaanngoq tikeqqipparput illoqarfiup tungaanut sangutinnata, kisianni maannakkut eqqissimalluinnartumik. Maanna eqqarsaatigilerpara immaqa ukioq manna kingullerpaamik Qaanaami imermik pilersuineq immami sikuusumi nilattarluni pinera. Periuseq qangarnisaavoq aningaasarpassuarnillu akeqarluni. Taamaattumik akikinnerusumik aalaakkaanerusumillu Qaanaami imermik imerneqartussamik pilersuinissap qulakkeerneqarnissaanut Nukissiorfiit aaqqiissutissarsiorsimapput.

Pilersaarut tassaavoq imiisivissuit tankit nutaat ikkussuunnisssaat taakku aasaanerani kuummiit imermik immerneqartassapput, taavalu ukiuunerani imeq taanna imermik pilersuinermut atorneqartassalluni. Suliaq tamanna aasamut Qaanaami sikueriarpat aallartinneqassaaq. Tamatuma naammassineqarnerata kingunerissavaa Qaanaami innuttaasut imermik imerneqartussamik pilersorneqarnerata pitsaanerulernera aamma aalaakkaanerulernera.