Imina Dronningip nersornaasiuttagaanik sølvimik saqqarmiortaalerpoq

Magssannguaq Imina ukiuni 40-ni aalajaalluni Qaanaami Nukissiorfinni sulisimanerminik ullumikkut nalliuttorsiutigineqassaaq

Aggustip ulluisa qulingiluaanni 1978-imi taamanikkut Grønlands Tekniske Organisationimi, GTO-mi, 1993-imi Nukisiorfinngortumi, atorfinippoq. Magssannguaq Imina Nukissiorfinnut nuuppoq taamanili sulisunut aalajangersimasunut ilaalerpoq.

Magssannguaq Imina suliamik ilinniagaliunngitsutut aallartippoq, kisianni piginnaanerpassuaqalersimalluni taamaattumillu piffissap ingerlanerani ataqqisaalluni suliassaminullu ataqqinnilluarluni imermik pajuttaassuarni aquttutut aamma arbejdsmanditut sulisuulluni eqiasuittoq.
– Magssannguaq Imina sulisutut aalajaatsuusutut nuannareqaarput. Inussiarnersuuvoq, suleqatikkuminartuulluni, aamma suleqataasa ikiuinissaa ilitsersuinissaalu naatsorsuutigiuaannarpaat, Kjell Bjergmann, Nunap Immikkoortuani Avannaani pisortaq oqaluttuarpoq nangillunilu:
-Nukissiorfinnut nuannersorujussuuvoq suliffeqarfimmi ukiuni 40-ni sulisimanerminnik nalliuttorsiortut arlaqartut nalliuttorsiutigisinnaajuaratsigit.

Nalliuttorsiortoq ulloq malunnartinniarlugu Dronningip nersornaasiuttagaanik sølviusumik saqqarmiortaarpoq. Tamatuma saniatigut Namminersorlutik Oqartussat nersornaataannik ukiunilu 40-ni pisortat suliffeqarfiutaanni sulisimaneranik nersorlugu diplomimik tunineqartussaalluni.

Qaanaami Nukissiorfinnut aammattaaq qaaqqusisoqarpoq Magssannguaq Iminap ilaqutai, ikinngutai aamma suleqatai qaaqquneqarput.

Nukissiorfiit nalliuttorsiortoq pilluaqqungaarpaat.