Kiassaanermut pumpinik suliniummi inernerugallartut

Marsimi Nukissiorfiit Kalaallit Nunaanni silaannarmiit silaannarmut kiassaanermut pumpinut suliniut saqqummiuppaat, tassannga inernerit siulliit maanna takkussuupput

Suliniummi siunertaavoq misissussallugu nukissiatigut aamma aningaasaqarnikkut sipaaruteqartoqarsinnaanersoq silap issinnerani silaannarmiit silaannarmut kiassaanermut  pumpit atorneqarnerisigut. Marsimiilli Nuummi aamma Sisimiuni atuisunit paasissutissat katersorneqarput atorneqalinnginneranni aamma atorneqalereerneranni paasissutissaasut.

Tassaavoq inuusuttoq Nina Heilmann, Issittumi ingeniøritut ilinniartuusoq ”Nukissiaq aamma illup iluani silaannaq” pillugit immikkut ilinniagaqartoq, kiassaanermut pumpi pillugu pilersaarusiortuullunilu misileraasuuvoq, avatangiisini nakkutigineqartuni aamma atuisut akornanni.

Uuliamik atuinerup annikillinera aamma illup iluani silaannaap pitsaanerulernera
Silaannarmiit silaannarmut kiassaanermut pumpinik pigisaqartut allattorsimaffiat nassarlugu Naja Sisimiuliarpoq illunut ataasiakkaanut kasuttoqattaariartorluni. Tassani inuusuttut ingeniøritut ilinniartoq tikilluaqquneqarluarpoq, misissuinermilu inuit 40-t miss. apersorneqartut suliniut pillugu paasissutissanik iluaqutaasunik pissarsiffigilluarpai.

Misissuinermi pineqarput silaannarmiit silaannarmut kiassaanermut pumpinik pillit misilittagaat aamma kiassaanermut atuinerat silaannarmiit silaannarmut kiassaanermut pumpit atulinnginneranneersut aamma atorneqalereernerisa kingornatigut.
– Amerlanerit kiassaanermut pumpit atulersimavaat aningaasanik sipaaruteqarniarlutik illullu iluata silaannaa pitsaanerulersinniarlugu. Oqaloqatigisama amerlanerpaartaat inimi imaluunniit igaffimmi kiassaanermut pumpi ikkutsissimavaat kiassaanermut tapertassatut. Ataasiakkaat kiassaanermut pumpit kiilerimi najugaqarfiusuni ikkutsissimavaat kiassaanermut atorusunnerullugit, Nina Heilmann oqaluttuarpoq.

Immikkut ittumik apersukkat tamangajammik erseqqissarpaat kiassaanermut pumpimik pissarsinissaminnut siunertarisimavaat kissarsuutip uuliatortup uuliamik atuinera annikillisinniarlugu. Piginnittut, qaammatit arfinillit sinnerlugit kiassaanermut pumpimik peqartut, oqaluttuarput uuliamik atuinertik ukiumut 500,00 koruuninik annikinnerulersissimallugu.
– Pingaarnertut isigisariaqarpoq apersukkat kiassaanermut pumpinik naammagisimaarinninnerat oqaluttuarlutillu illup iluani silaannaq pitsaanerulersimasoq, Nina Heilmann oqarpoq.

Nuummi containerinik misileraaneq
Nuummi aammattaaq kiassaanermut pumpinik aamma supoorutinik suliniummik ikkussisoqarpoq uuttuutitalinnik, taakku kissassuseq/nillissuseq aamma nukissiamik atuineq uuttortassallugu.

Suliniummi pineqarput nillataartitsivik containeriusoq 20 fodinik angissusilik aamma quit marluk 5,3 m2-nik angissusillit. Quit aappaat innaallagiartortumit supoorummit nalinginnaasumit kiassarneqarpoq, aappaa silaannarmit silaannarmut kiassaanermut pumpimit.
– Nillataartitsiviup containerip siunertaraa ”silami silaannarmik” avatangiisini nakkutigineqartuni pilersitsinissaq, tassani uagut containerimi kissassuseq/nillissuseq aamma aalaqarnera aqussallutigu, taamatut nunatsinni silaannarmut eqqaanartunngortillugu, Nina Heilmann oqaluttuarpoq, nangillunilu;
– Suliniutip tamatuma siunertaraattaaq silaannarmiit silaannarmut kiassaanermut pumpit issittumi silaannarmi qanoq pitsaatigisinnaanerat iluaqutaatigisinnaanerallu uuttortarneqarnissaa, silami kissassutsip/nillissutsip aamma illup iluani kissassutsip assigiinngitsorujussuusinnaammata, tamatuma misileraanermi angusarisat pitsaassusaannut tamanna sunniuteqarsinnaammat.

Nillataartitsivimmi containerimi nillissuseq ullut tallimakkaarlugit allanngortinneqartarpoq
– Misileraanermit inernernik eqqortunik saqqummiussinissamut suli siusippallaarpoq, tassami juunimi uuttuisarneq aatsaat aallartipparput. Kisianni qilanaaraarput misissuinernit taakkuninnga inernernik septembarip naanerani saqqummiussinissatsinnut, Nina Heilmann oqarpoq.

Nuummi innaallagialerisutut suliffeqarfik Carl Lynge ApS kiassaanermut pumpinik atugassaqartitsisuuvoq.