Nukissiorfiit taarsiissuteqarnissamut apeqqut erseqqissarpaa Uummannami imermut tunngatillugu pisup kingunerisaanik

Ippassaq KNR-imi allaaserineqartoq isumaqalersitsivoq Nukissiorfinnit oqartoqartoq “Sillimmaserneqanngikkussi taarsiiffigineqassanngilasi”. Soorunami Nukissiorfiit taamatut isumaqanngillat tamannalu paatsoornermik pissuteqarsimassaaq. Taamaattumik Nukissiorfiit matumuunakkut erseqqissaateqarniarput ajutoornermik nalaataqarsimasut qanoq iliornissaannut tunngatillugu.

Pigisat ajoqusikkat aamma inuussutissarsiornermi iluanaarutissaraluanik annaasaqarneq

Nalileraanni illuutigisami pigisanik ajoqusertoqarsimasoq, tassunga ilanngullugit nioqqutissiat, imermit uuliamik mingutsinneqarsimasumit Nukissiorfiit nioqqutigisaata kingunerisaanit pisimasut, taava ajoqusigaq naatsorsorneqassaaq tamannalu Nukissiorfinnut allakkatigut piumasaqaatitut ingerlateqqinneqassaaq uunga juridisk@nukissiorfiit.gl. Taamaalisoqarpat taava Nukissiorfiit sillimasiissuteqarfigisani suleqatigalugu suliat ataasiakkaat immikkoortukkaarlugit nalilersussavaat.

Nammineq sillimmaserneqarsimagaanni isumassatsialaassaaq aammattaaq taakkua ilanngutsinneqarneri.

Nukissiorfinnit imermik imerneqarsinnaasumik minguitsumik pissarsisinnaaneq amigaataasimappat, tamatumalu kingunerisaanik nammineq suliffeqarfiutigisami iluanaarutissanik annaasaqarsimalluni, taava qaqutiguunngitsumik ingerlatsinermi ingerlatsinermi annaasaqaatinut sillimmaserneqarsimanikkut taarsiiffigitittoqarsinnaavoq. Imaappat ingerlatsinermi annaasaqaatinut sillimmateqarluni taava tassunga saaffiginnittoqassaaq. Paarlattuanik annaasaqaatigisimasat naatsorsorneqassapput kiisalu Nukissiorfinnut allakkatigut saaffiginnilluni uunga juridisk@nukissiorfiit.gl. Taamaalisoqarpat taava Nukissiorfiit sillimasiissuteqarfigisani suleqatigalugu suliat ataasiakkaat immikkoortukkaarlugit nalilersussavaat.

Aningaasarsiaqartutut sulinermi akissarsiassanik annaasaqarneq

Sulisut suliffimminnit angerlartinneqarsimasut tassanngaannarlu suliffeqarfiup tunisassiornerminik unitsitsinera pissutigalugu isertitaaruttut, taakkua pisortanit suliffeerunnermi ikiorsiissutinik pissarsiaqarnissaminnut periarfissaqarput. Tunisassiornermik unitsitsineq tassaasinnaavoq suliffeqarfimmit matusigallarneq pisunik siumut takorloorneqarsinnaanngitsunik peqquteqartoq.
Inuit suliffimminnit angerlartinneqarsimasut Majoriamut saaffiginneqquneqarput suliffeerunnermi ikiorsiissutinik qinnuteqaateqaqqullugit. Tamanna piaartumik pisariaqarpoq.

Ajortittoqarneranik killiliiniarneq

Nukissiorfiit tallimanngorneq 20. septembarimiilli ajornartoornermi upalungaarsimaneq tunngavigalugu Uummannami pisoq aaqqiiffiginiarlugu sulillutik aallartipput. Pisoq Nukissiorfinnit assorsuaq ilungersunartutut isigineqarpoq, tassami inuit imermik imerneqartussamik qulakkeerinninneq, Uummannami inuussutissarsiummik suliffiutillit aamma innuttaasut ulluinnarni inuuniarnerat annertuumik eqqorneqarmata. Nukissiorfiit Uummannami taamatullu suliffeqarfiup ilaani allarpassuarni sulisui qasusuillutik ullaaralaamit unnussuarmut, kiisalu sapaatit akunnerisa naaneranni suliuarput ajoqutaasut aamma pisup kingunerisai sapinngisaminnik annikillisaarniarlugit. Uagut suliffeqarfittut aamma inuttut pisumit assorsuaq sunnertissimavugut aamma sapinngisarput tamakkerlugu iliuseqarpugut Uummannami inuunerup aamma ulluinnarni atugarisaasut nalinginnaasunngortinnissaat anguniarlutigu.

Sukumiinerusumik oqaaseqartitsisoqarniaruit taava saaffiginnigit uunga nukissiorfiit@nukissiorfiit.gl.