Sanaartukkat arlallit avannaarpiaani ingerlanneqarput

Qaanaami imermit nukissiorfimmik nutaamik sanaartorneq aamma Qeqertani innaallagissiorfiliorneq maanna ingerlalluarput

Qaanaamut umiarsuaq assartuut qaammammi kingullermi tikippoq. Usiisa ilagaat Nukissiorfinnut atortussat illoqarfimmi imermut tankersuarmik nutaamik sanasoqarnissaanut atorneqartussat, aamma nunaqarfimmi Qeqertani innaallagissiorfissamut siullermut atugassat.

Ukiorpassuarni Qaanaaq immamit sikuusumit ilulissanit nilattartarluni imermik pilersorneqarpoq. Tamanna periuseq ingerlatiinnarneqassaaq suliap naammassineqarnissaata tungaanut.
– Qilanaarisimavarput suliassap tamatuma pingaaruteqartup aallartinneqarnissaa, taamaalilluta illoqarfik imermik pilersulersinnaaniassagatsigu ullutsinnut tulluarnerusumik periuseqarnikkut, Kjell Bergman, Nunap Immikkoortuani Avannaani pisortaq oqaluttuarpoq.

Qaanaami  tanki imiisivissaq siusinnerpaamik 2021-mi naammassineqassaaq. Ukioq manna suliassaq tassaavoq poorsuit 375-it issortussanik imallit putorsuarmut iliorarnissaat, taakkua tankip imiisiviup, aappaagu Qaanaamut tikisinneqartussap, toqqavissaanut tunngaviussapput. Tanki imiisivik 5.000 kubikmeterinik imartussuseqartoq kuummit imermik immerneqassaaq, taamaalilluni imeq ukiuunerani imermik pilersuinermut atorneqartassalluni.

Sarfaq imerlu Qeqertanut
Nunaqarfik Qeqertat, Qaanaap kangiani 60 kilometerit miss. ungasissusilimmiittoq, aammattaaq innaallagissiorfimmut, ukiamut naammassinissaa naatsorsuutigineqartumut, atortussanik tigusaqarsimavoq.

Innaallagissiorfik nutaaq naammassippat siullermik aqqusinerni qullersuit atorneqalissapput aamma sarfap aqqutaanut nunaqarfimmi najugaqartut ilanngutitinneqarsinnaalissallutik.

Naalakkersuisut aasaq manna innaallagissiorfimmut innuttaasut ilanngutitinneqarnissaat akuersissutigaat, tamanna nuna tamakkerlugu Nukissiorfiit innaallagissamut akigititaata qaffanneqarneratigut aningaasalerneqassalluni. Aningaasaqarnermut inatsit 2018 aqqutigalugu Qeqertat nunaqarfittut inissisimalernissaat aalajangiunneqarpoq. Tamatuma kinguneranik ilaatigut Nukissiorfiit nunaqarfimmi innuttaasut innaallagissamik aamma imermik pilersussavaat. Nukissiorfiit naatsorsuutigaat innaallagissiorfiup illunut siullernut pilersuinissaa ukiaq manna pinissasoq, tamatumunngali apeqqutaavoq silap qanoq innera. Ullumikkut nunaqarfimmi innuttaasut 25-t missaanniittut namminneq generatoriminnit innaallagissamik pilersortuupput.

Imeqarfik 2020-mi
Aammattaaq imeqarfissap toqqavissaa sananeqarpoq nunaqarfimmiut taamaalillutik imermik saligaatsumik pissarsisinnaalissammata. Tamatuma saniatigut imermut salinneqanngitsumut aqqutissaq 1,3 km missaanniittoq tatsimit Amitsukujuumit pilersinneqassaaq (Taseq 2, aaqqissuisoq). Tamanna pissaaq 2020-mi.

Amitsukujuumi erngup salinneqanngitsup annertussusia naammappoq nunaqarfimmiut aamma amerlippata pilersorneqarnissaanut immaqalu aalisakkerivissamut.

Qaanaaq

Qeqertat