Taartumi qaamaneq

Ullumikkut imermik aamma innaallagissamik Qeqertani pilersuineq ”assammit” pisarpoq. Kisianni qanittukkut tamaani imeqarfeqalissallunilu innaallagissiorfeqalissaaq

Imaani sikuusumi 64 kilometerit missiliorlugit biilereerluni Qeqertamut apuuttarput, taanna Qaanaap kangianiippoq. Avatangiisit pinningaarmata alagassaanngillat killingusaaq, Qeqertat avatangiiserisaat, nalissaqanngilluinnarluni. Nuna tamanna soorlumi qangarsuarmi nunamut eqqaanartoq, nunataq suli tikinneqarsimanngitsoq, imaluunniit qanga najugaqarfinni piniarnermik inuussuteqarneq ilaqutariinnut apeqqutaatinneqarallarneranut kingumut qiviariarnerulluni. Naalakkersuisut aalajangerpaat Qeqertat nunaqarfittut inissisimanissaa. Tamatuma kinguneranik ilaatigut Nukissiorfiit nunaqarfimmi najugaqartut innaallagissamik aamma imermik pilersortussaavaat.

Qeqertani inuit 25-t miss. innuttaasuupput. Isertitaqarfigisartagaat pingaarnerpaaq tassaavoq arferit, puisi aamma aalisakkat, tamakkulu inuuneqarnerup sakkortusinnaaneranik taamaattorlu piviusumik inuuneqarnermik takutitsisuullutik.

Ilaatigut imissaminnik pissarsiniarlutik namminneq nilattartarput periuseq eqqiluippallaanngitsoq aamma pisariusoq. Innuttaasut innaallagiaqarunik taakku namminneq generatoriminnit pissarsiarisarpaat. Tassami Qeqertat sumiiffimmi imeqarfeqanngillat aamma innaallagissiorfeqarnatik. Tamanna maannakkut Nukissiorfiit iliuuseqarfiginiarpaat.

Aqqusinerni qulliit aamma innaallagissap aqqutaa
Kalaallit Nunaata avannaani assartuinerup aamma silap qanoq issusianut tunngasut ajornartinngippassuk, suullu tamarmik pilersaarutigineqartut ajunngitsumik ingerlappata, Qeqertat namminneq ukioq manna nunaqarfittut innaallagissiorfeqalissapput, kingornatigullu 2020-mi namminneq imeqarfeqalissallutik. Umiarsuaq assartuut siulleq Qaanaamukartoq ilaatigut useqartinneqassaaq containerinik qulinik innaallagissiorfiliornissamut atortunik ulikkaartut.

Nunaqarfimmi innaallagissiorfissap toqqavissaa (assimi takuneqarsinnaasoq, aaqq.) ilusilersorneqareerpoq innaallagissiorfiullu atortussai sinneruttut ukioq manna Qeqertamut apuunneqassallutik.

Inuunerannut innaallagissiorfeqalerneq taartumi qaamanertut kinguneqassaaq. Tassa; aqqusinerni qulliit aamma innaallagissap aqqutaa ikkussorneqassalluni nunaqarfimmi innuttaasut namminneq peqataaffigilersinnaasaat.

Imeq 2020-mi
Nukissiorfiit aammattaaq Qeqertani imeqarfissap sanaartorneqarnissaanut piareersaallualereerput. Taamaaliornikkut innuttaasut ajornannginnerusumik imermik saligaatsumik pissarsisinnaalissapput, namminneq taamatut ikkussivigineqarnissartik toqqarpassuk, imaluunniit imertartarfimmi imertarsinnaalerlutik.

Pilersaarutaavoq ukioq manna nalinginnaasumik nunaqarfinni atorneqartartup atortup toqqavissaata sananeqarnissaa. Tamatuma saniatigut 1,3 km miss. tatsimit Amitsukujuumit erngup salinneqanngitsup aqqutissaanik 2020-mi suliaqartoqassaaq (Taseq 2, aaqq.).

Tatsimi Amitsukujuumi erngup salinneqanngitsup imaqqortussusia nunaqarfimmi innuttaasoqarnerulissappat aamma aalisakkerivissaqalissagaluarpat pilersuinissamut naammalluni.