Tankit imiisiviit tamarmik maanna imermut imerneqarsinnaasumut atorneqarnissaat akuersissutigineqarpoq

Uummannami imiisiviit kingulliit qulit maanna imermut imerneqarsinnaasumut atorneqarnissaat akuersissutigineqarpoq.

Taamaattumik maanna imermik pajuttuisarneq Pinngortitamut Avatangiisinullu  Naalakkersuisoqarfiup akuersissuteqarnera malillugu nalinginnaasumik ingerlasinnaalerpoq ullumi oktobarip ulluisa 24-anni.

Uummannami imiisiviit kingulliit qulit atorneqarnissaannut killilersuinermik allannguinerit.

Pinngortitamut Avatangiisinullu Naalakkersuisoqarfik ullormi 22. oktobarimi 2019 Uummannami imiisiviit kingulliit qulit (allattorneqarnerat ilanngussaq takujuk) imertaannik misissuisimanermut inernerit naammaginartut tigusimavai. Taamaattumik naalakkersuisoqarfiup imiisiviit taakku atorneqarsinnaanerannut killilersuinerat atorunnaarsinneqarpoq. Imeq taakkunannga imiisivinneersoq taamaalilluni imerneqarsinnaaleqqippoq.
– Issuaaneq naavoq

Uummannami imermik pajuttuisarnerup nalinginnaasunngorneranik tamanna kinguneqarpoq. Nukissiorfiit suli sulissutigaat maqinneqartunik imeqartunut pilersuinerup nalinginnaasunngortinnissaa.