Tasiilami imermit nukissiorfiup allineqarnera

Nukissiorfiit Tasiilami imermit nukissiorfiup imeqarnerulernissaa qulakkeerpaat

Imermik suli annertunerusumik pissarsiniarluni pisariaqarsimavoq kuup ingerlaarnerata allanngortinneqarnissaa.

Juuli qaammat tamaat Nukissiorfiit Tasiilap avannaata kitaani kuunngualiortoqarnissaanut assaatitsisimapput tatsip 160-ip eqqaani, tassannga imeq toqqaannartumik imermit nukissiorfiup imeqarfianut maanna kuutsinneqartalerluni.

Nukissiorfiit siullermik qulakkeerniarpaat assallugu kuunngualiap ukiup qanoq ilinerani allanngorartarnernit ajoqusersinnaajunnaarsinneqarnissaa, kingusinnerusukkullu isummerfigineqassaaq erngup ingerlaarfia allanngortinneqannginnissaa anguniarlugu suli assaaqqittoqassanersoq imaluunniit suli cementimik kuisoqaqqissanersoq.

Assartuinermut atortumik nutaamik nassaartoqarnera
Kisianni tassa tamanna suliaavoq ajornakusoortoq. Unamminartuuvoq assaanermut qamussuit kuummut ingerlaarfianik allanngortitsivigineqartussamut ingerlanneqarnissaat. Suliaq najukkami entreprenøri suleqatigalugu naammassineqarpoq. Immikkut ittunik puttasulialiortoqarpoq dunkinut eqqaanartunik. Taakku pramimut aquuteralalimmut kattunneqarsinnaapput. Taamaaliornikkut iluatsippoq sulisussat aamma assaanermut qamussuit assartorneqarnissaat.

Imermit nukissiornerup annertusineqarnera qanoq kinguneqassava?
Annertusisitsineq kinguneqarsinnaavoq dieselimik atuinermik annikillisitsinermik, siornatigut imeqarfimmi imermik amigaateqarfiusumi. Tamanna ilutigalugu tatsimit erngup annertunerulernera Tasiilami kiassaanermik nioqquteqarnermik annertunerulersitsisinnaavoq.

Tasiilami innaallagissamik pilersuinerup annertunerpaartaa imermit nukissiorfimmit pisuuvoq. Nukissiorfiit anguniagaraat nukissiamik pilersuinerup sapinngisamik annertunerpaartaa ataavartumit nukissiornermit pissarsiaassasoq.

Taamaattumik Nukissiorfiit ukioq manna qulakkeerpaat Tasiilami imermit nukissiorfimmut erngup annertunerulernera. Tamatuma saniatigut ukiumi kingullermi imermit nukissiorfimmi tekniskiusunik allannguisoqarpoq, erngup suli pitsaanerusumik atorluarneqartalerneranik tamanna kinguneqarluni.  Imermit nukissiorfik Tasiilamiittoq maanna ima pitsaatigilerpoq Nukissiorfiit siorna aasaanerani ilaatigut atuarfimmik kiisalu Nukissiorfiit illuutaannik imermit nukissiorfimmit nukissiamit ataavartumik pisumit  kiassarneqalernerannik.