Therkild Lynge Dronningimit nersornaaserneqartoq

Nukissiorfiit nalliuttorsiortoq Therkild Lynge tulluusimaarutigaat ullumi Dronningip nersornaasiuttagaanik sølviusumik nersornaaserneqarmat. Therkild Lynge ukiunik 40-nngortorsiorluni nalliuttorsiornermini, juunimi 2017-imi, Namminersorlutik Oqartussanit allagartamik nersornaaserneqarpoq pisortani sulisimanera nersorniarlugu.

Therkild Lyngep aalajaalluni pimoorussilluni suliffeqarfimmi atorfeqarsimanera pissutigalugu Nukissiorfiit Dronningip Fortjenstmedaljeanik sulisup taassuma pikkorissup nersornaasigaanissaanik qinnuteqarnissani toqqarpaat.

Qinnuteqaat suliarineqareerluni akuersissutigineqareermat ataqqinartumik nersornaasiuttagaq tunniunneqarsinnaanngorpoq. Tamanna persuarsiornartumik Qeqertarsuarmi ullumi pivoq.

Pilersaarutaagaluarpoq teknikkimut pisortaq Mogens Nielsen saqqarmiumik tunniussisussaasoq, kisianni ulluni kingullerni sila aamma timmisartukkut angallassineq allatut itsitsiniarsimavoq. Tamaammat Nunap Immikkoortuani Pisortaq Rene E. Fleischer saqqarmiumik sølviusumik Therkild Lyngemut tunniussisuuvoq, pineqartoq Grønlands Tekniske Organisationimi sulilerpoq kingusinnerusukkut taaguuteqarlersumi Nukissiorfiit.

Therkild Lynge Qeqertarsuarmi, Nunap Immikkoortuani Diskomi, ullumikkut teamlederiusoq ukiuni 40-ni sulereersimalluni aaqqissuussinikkut aamma inuiaqatigiinnut piumasaqaatit ukiut ingerlaneranni allannguuteqarsimasunut tulluarsartuartarpoq. Nammineerluni ilinniakkanut pikkorissarnernullu qinnuteqartarpoq, soorlu aamma kinguneqartussanik siunnersuisarlunilu ilitsersuisartoq tamakku pisariaqaraangata, suleqatiminut aamma lærlinginut.
– Therkild Lynge ilisimasarpassuaqarlunilu ilikkagarpassuaqarpoq, tamakku Nukissiorfinnik atuisunut atorfilinnullu iluaqutaapput. Isumagissaartuaannartuuvoq sulisuullunilu suliffeqarfimmi tamarmi nuannarineqarluartuuvoq. Suliassat piffissaagallartillugu naammassineqartarnissaat pingaartuutippaa, tamakkulu pitsaassuseqarluartumik naammassineqarnissaat, teknikimut pisortaq Mogens Nielsen oqaluttuarpoq nangillunilu:
– Uagut inassuteqarnerput suliamik naammassilluakkamik tunuliaqutaqarpoq. Taamaattumik nuannaarutigeqaara Therkild Lyngemut una nersornaat ataqqinartoq ullumikkut tunniutissallugu, tamannalu ilutigalugu Nukissiorfiit tungaannit Therkild Lyngep pingaaruteqarluartumik suliaqartarneranik nersorniarlutigu, Mogens Nielsen naggasiivoq.

Nunap Immikkoortuani Pisortaq Rene E. Fleischer najukkami suleqataasut peqatigalugit kusanarluinnartumik saqqarmiortaamik tunniussinermik malunnartitsinermik aaqqissuussipput. Tamannalu ilaquttat, ikinngutit, ilisarisimasat aamma Qeqertarsuarmi suleqatit peqatigalugit nalliussineqarpoq.