Ukiuni 25-ni angutit suliffigisartagaanni

Ilinniakkaminik naammassinninnissaminut qaammatit marluinnanngortut Marianne Begstrupip atorfik, inuunerminik allannguilluinnartussaq, inuttassarsiuunneqartoq takuaa

Ukioq 1993-iuvoq Marianne Begstrupilu Maskinmesterskolenimi Svendborgimiittumi maskinmesteritut ilinniakkaminik naammassinninniarpoq (ilinniartuni 250-iusuni kisimi arnartaalluni, aaqq.).

Atorfimmi inuttassarsiuunneqartumi oqaaseqatigiit Mariannemik soqutiginnilersitsisut imaapput: ”… ilaatigut atugarisani erloqinarsinnaasuni…”. Oqaaseqatigiit taakku arnap imaannaanngitsup, Kenyami 1952-imi inunngortup, uummataa iluunngarlugu eqqorpaat.
– Arnaqatikka Rødstrømpet angutit illumi suliassanik suliaqaqataasalernissaannik meeqqanillu paarseqataasalernissaannik oqaluttut taamani tusaakataavippakka. Isumaqarpunga uagut arnat suliassanik ilaannik suleqataasalissasugut, suliassanik angutinit isumagineqartartutut ilisarnaateqartunik, taamaaliunngikkutta naligiissitaaneq uannut isumaqanngilaq, Marianne oqaluttuarpoq nangillunilu:
– Arnat aammattaaq ipertuumi nukinnillu atuiffiusuni sulisinnaasariaqarput. Taamaattumik atorfimmi inuttassarsiuunneqartumi oqaaseqatigiit tiguarpaannga, qinnuteqaateqarfigisariaqarlugulu, oqaluttuarpoq. Marianne Begstrupilu allamut saariartinnani Pilestrædemi Københavnimiittumi iluatsilluartumik oqaloqatiginnereerluni atorfinippoq Maniitsumullu maskinmesterinngoriartorluni taamanikkut ernini arfinilinnik ukioqartoq ilagalugu aallarluni.

Angutit suliarisaat tassaavoq Mariannep suliarisaa
Maskinmesteritut ilinniakkami saniatigut Marianne Begstrup aamma blikkenslageritut (qillertoqqerisutut) ilinniagaqarpoq 1981-imiillu 1987-ip tungaanut Mocambiquemi blikkenslageritut sulilluni. Angutit suliarisaat taamaattumik arnamut nukittuumut ajornanngitsuuvoq, – taamaattumillu aamma nuannarisuullugu.

Qillertoqqerisutut aammattaaq Mariannep sungiusimavaa suliffinni angisuuni untritilinnik arlaqartunik sulisulimmi arnartatuaasarluni.
– Maniitsumi atorfik ajornaatsuinnaannginnissaanut piareersimavunga, taamanikkullu Maniitsumi maskinmesteriusunik unammillerneqarlunga. Kisianni sulisut allat ajornartorsiutitaqanngitsumik pivaannga, maannalu ukiut 25-t tassa qaangiullutik, illarluni oqaluttuarpoq.

Maniitsoq pitsaanerpaavoq
Marianne Begstrup Maniitsumulli pigami kingornatigut Nukissiorfinni atorfimmini qaffakkiartuaarpoq. Ukiuni 1996-imiit 2014-ip tungaanut ingerlatsinermut pisortaavoq aamma kiassaanermut nunaqarfinnullu teamlederiulluni.
– Aallartiffinnut 2014-imiit kingumut uterpunga, tassa kiassaateqarfimmut. Kalaallit Nunaanni assigiinngitsuniittarpunga, kisianni Maniitsoq tassaavoq nuannarinerpaasara, oqarpoq.

Nalliuttorsiortoq isumaqarpoq piffissap ingerlanerani suliat assigiinngitsorpassuit, minnerunngitsumillu illoqarfimmik nuannarisaqarnerup, atorfeqaannartissimagaanni, kisianni aammattaaq Nukissiorfinni atorfimmi akisussaaffeqarnerup sulerusussuseqaannartissimagaani.
– Atorfigisarsimasanni assigiinngitsuni Nukissiorfinni suleqataasutut uagut akisussaaffeqarnitta  sulerusussuseqaannartissimavaannga. Suliffik paarilluarlugu illoqarfimmi aamma nunaqarfimmi suut tamarmik ingerlalluarnissaat isumagisaraanni, taamaalillunilu pisussaagaluit ajorsinnaasut pinngitsoortinniarlugit, taava ajortoqassanngilaq, taava qulliit ikissinnaavagut, imeq kuussinnaalluni kiassaatillu kiassaasinnaallutik.

Asseq: Marianne Begstrup Skypekkut suliamut tunngatillugu ataatsimiititaliami ataatsimiinnermi.