Uummannami Innuttaasunut ataatsimiitsineq imeqarniarneq pillugu

Inuit 150 pallillugit takussimapput Nukissiorfiit innuttaasunut ataatsimiitsitsineranni imeqarniarneq pillugu apeqquterpassuarnik akissutisinissaminnik paasiniaajartortunik. Innuttaasunut ataatsimiitsitsineq pivoq ulloq 26. september nal.: 18:00 – 22:00 Timersortarfimmi. Ataatsimiitsitsinerit aappassarivaat Uummannani erngup mingutsinneranut tunngasuusumik. Ataatsimiitsitsineq siulleq pivoq ulloq 22. september nal.: 15:00 – 18:00 tungaanut.

Nukissiorfiit qullersaqarfianiit najuupput Nukissiorfiit pisortaq Michael Pedersen, Teknikkukkut pisortaq Kenneth Nyland kiisalu Peqqinnissarqarfimmiit peqataalluni nakorsaq Sine Djernes taakkulu pisoq pillugu nassuiaapput apeqqutinillu akiuillutik. Ataatsimiitsitsinermi apeqquterpassuarnik apersuisoqarpoq inuppassuarnik peqataaffiusumiit soorlu qaqugu imeq imeqqinneqarsinnaalerumaarneranik apeqqutit.

Misissuinerit siulliiit Danmarkimi laboratoriamiit sapaatiummat tiguneqarsimapput Nukissiorfiit saliillutik aallartereersut siullermik imeqarfimmi kiisalu erngup aqqutaatigut.

  • Imeq suli olietaqarnera takussutissartaqarsimavoq kisianni annertunngitsumik
  • Annikitsuinnarmik olie-koqarpoq peqqinnissamut annikitsumik navianaataasinnaasumik
  • Olie-mik mingutsitsineq annikilliartorpoq

Ullut tamaasa laboratorianut imermik misiliutit nassiussuunneqartarput taamaattorli ullut tallimat missaani akissutissai tiguniarneqartarlutik. Oqaatigisinnaavarput misissuinerit kingulliit pitsanngoriartortut. Kisianni qulakkiivittariaqarparput misissuinerit inernerisa takutinnissaat erngup minguitsuunera imerneqaqqilersinnaaneranut nalunaaruteqartinnata. Pissangalluta utaqqivugut taamak oqarpoq teknikikkut pisortaq Kenneth Nyland.

Apeqqutit allat teknikkimut peqqinnissaqarnermullu tunngassuteqarsimapput soorlu: qanoq mingutsitsineq pisinnaasimava, nammineq qanoq saliisoqarsinnaava kiisalu imeq qanoq peqqinnissamut ulorianaateqarnersoq. Apeqqutigineqarportaaq imermut akiliisoqassanersoq mingutsitsinerup nalaani.

Nukissiorfiit pisortaata Michael Petersen akivoq september qaammat naallugu akiliisoqassanngitsoq kiisalu imeqarniarneq iluarsitinnagu imermik akiliisoqassanngitsoq.

Malunnarsivoq innuttaasut naatsorsuutigisimaluaraat Nukissiorfiit qullersaqarfianiit oqariartuutigineqassasoq imeq imerneqaqqilersinnaasimasoq.

Michalel Petersen nangippoq pakatsinerat paasisinnaallugu. Ulluinnarni inuuniarnissinnut imeqannginneq kalluaataasupillussuuvoq kiisalu ilungersunartorsiortitsilluni. Inuup kukkuneranik peqquteqarpoq taamaattorli sapinngisarput tamaat atorlu ajornartorsiummik aqqiinniarpugut