Uummannami imeq imerneqarsinnaalerpoq

Ullumikkumiit Uummannarmiut angerlarsimaffimminni kuuginnartumik imillit tamarmik imertik imeqqissinnaalerpaat.

Illoqarfik immikkoortunut pingasunut agguataarnikuuvoq, taakkulu ilaanni tassa illoqarfiup qeqqani B-mi aammalu immikkoortup A-p kangiata tungaanni oktoberip 8-ani 12-anilu imeq ammarneqarnikuulluni . Ullumilu immikkoortoq C-mi illoqarfiup kitaa tungaanniittumi imeq imerneqaqqissinnaanngorpoq.

Nakkutilliisoqarfik Nukissiorfimmut ullumi novemberip 22-anni ima nalunaarpoq:

Pinngortitamut Avatangiisinullu Naalakkersuisoqarfik 22. november 2019-imi nakorsaaneq isumasioqatigereerlugu naliliivoq, Uummannami killermi imermut aqqusersuutit naammaginartumik pitsaassuseqalersut, taamaattumillu imeq imertut imigassatut atorneqarsinnaalerluni.

Taamaalilluni Uummannami imermut aqqusersuutit atorneqarnissaannut killilersuineq tamarmi atorunnaarpoq, aammalu kikkut tamarmik kuutsitsillutik imersinnaalerput.

Taamaakkaluartorli piffissami qanittumi suli oliamik Imermut aqqutersuutit (ruujorit) sinneqalaartarsinnaapput. Uummannarmiulli tamanna ernumassutigissanngilaat olia minguitsuummat taamalu annikitsigisoq peqqissutsimut ajoqqutaasinnaasumik akoqanngimmat, Nunatta nakorsaanera Henrik L. Hansen nalunaarpoq.

Nukissiorfinni pisortaagallartoq Claus Andersen-Aagaard: Assorsuaq nuannaarutigaaara Uummannarmiunut nalunaarutigissallugu angerlarsimaffinni imeq innuttaasunit tamanit imerneqaqqissinnaalermat. Tamanna innuttaasunit imertartarfinnut piffinni assigiinngitsuniittuni imertartariaqarsimasunut oqiliallaataassaqaaq. Nukissiorfinni sulisut Uummannami sapaatit akunnerpassuit imeqaleqqinnissaq pillugu ulapissimaqaat, taakkununngattaaq aamma oqiliallannaqaaq erngup imerneqaqqissinnaalernissaata iluatsinnissaanut imaannaanngitsumik suliaqarsimagamik.

Uummannarmiut septemberimi, oktoberimi novemberimilu innaallagissamik imermillu akiliissanngitsut aaliangiupparput piffissap taassuma iluani eqqugaanerlunnerata taarsiiffiginissaa pissutigalugu.

Innuttaasut tamarmik imermik sunut tamanut atuisinnaanngoqqinnerat toqqissisimanartutut inissisimaffigaarput. Pingaarporli erseqqissassallugu sivisuumik misiliinitsinni oliakumik naammattuuisimannginnatta. Nukissiorfiit Uummannami imeq suli nakkutigilluarallassavaat, Claus Andersen-Aagaard naggasiivoq.


image