Uummannami imeqarfik oqartussaasunit akuerineqarpoq. Akuersissuteqarnermili erngup aqqutaa suli ilanngunneqanngilaq.

Nukissiorfiit Uummannami erngup imerneqartussap uuliamik mingutsinneqarneranik ajutoortoqarmalli ingerlaavartumik saliinissamik aamma misissuisarnissamik pilersaarutinik ingerlatsipput. Nukissiorfiit ullut tamaasa laboratoriani misissugassanik nassiussisarput. Tamanna tunngavigalugu Nukissiorfiit ullumikkut avatangiisinut oqartussaasunit akuersissummik pissarsipput Uummannami imermik pilersuinerup ammaateqqinnissaanut.

Pinngortitamut, Avatangiisinullu Naalakkersuisoqarfik nalunaaruteqarpoq:

“Pinngortitamut, Avatangiisinullu Naalakkersuisoqarfiup ullumi 29. septembari 2019 imermit imeqarfimmeersumit erngup misissorneqarneranit inernerit utertinneqartut tiguaat, taakkunanilu takuneqarsinnaavoq erngup pitsaassusia naammaginartoq.

Tappiorannartut kemiskiusut aamma mikrobiologiskiusut imermit misissoqqissaarneqareersimasumit, tassa mingutsitsisimanermut ilisarnaatinut tunngatillugu, taakkunani maluginiarneqarsinnaasimanngillat killiussaatut naligitinneqartussanit nalunaarummi uani “Erngup imigassap pitsaassusia aamma imermik pilersuiviit nakkutigineqarnerat pillugit Namminersornerullutik Oqartussat nalunaarutaat nr. 7, 17. marts 2008-imeersumi” qaangiisoqarsimaneranik takussutissartaqanngilaq.

Tamatuma pisinnaatilerpaa imeqarfimmi erngup illoqarfimmi innuttaasunit nalinginnaasumik atorneqarsinnaasunngorsinnaanera.

Naalakkersuisoqarfimmit eqqumaffigeqquneqarpoq imermit atueqqilersinnaanermi pineqanngimmata erngup aqqutai imaluunniit imermut tankit inuit namminneq pigisaat”.

Tamanna imatut paasineqassaaq imeq Nukissiorfiit imeqarfianeersoq maannakkut imertut imerneqarsinnaasutut akuerineqarnera. Maannakkut Nukissiorfinnit Avannaa Seafood aamma Royal Greenland oqaloqatigineqarput biilit imertaassuit atorlugit imermik pajuttarnissaq pillugu, tassani siunertarineqarluni fabrikini taakkunani marlunni tulaassuineq aallarteqqinniarlugu. Neriuutigineqarpoq aaqqiissutigineqartoq ataasinngornermi 30. septembari tamatuma tusarliutigineqarsinnaanera.

Tassa imermit atuilersinnaanermi erngup aqqutaa aamma imermut tankit pineqanngillat, taamaattumik imeq qorlortitsivimmit toqqaannartumik imerneqaqqusaanngilaq. Ilungersuutigalugu sulissutigineqarpoq erngup, erngup aqqutaaneersup aamma imiisivinni tankineersup atorneqarsinnaalernissaa.

Soorlu siornatigut nalunaarutigineqareersutut marlunngornermit innuttaasut imeq maqinneqarsinnaasoq atorsinnaavaat uffarnerminnut, erruinerminnut aamma atisanik errorsinermut. Innuttaasut imermut tankiutillit imeq errortornermut, atisanik errorsinermut aamma eqqiaanermut atorsinnaavaat. Erngup illup iluani qorlorfia uuliamik mingutsitsineq ilisimaneqalermalli atorneqarsimanngippat, taava imeq atorneqannginnerani  sivisulaartumik kuutseqqaarneqassaaq.