Uummannami imermik pilersuineq aaqqikkiartulerpoq

Uummannami imeq imerneqarsinnaasoq uuliamik mingutsinneqarsimanera tallimanngornermi septembarip ulluisa 20-annili paasineqarmat Nukissiorfiit Ummannami innuttaasut imermik avataaneersumik pilersulerpaat. Imermik Ikerasammit aallertoqarpoq aamma RAL-ip umiarsuaataa Pajuttaat Aasianniit imermik imerneqarsinnaasumik pajuttuisissimallugu. Kisianni maanna ajornannginnerulerpoq imermik imerneqarsinnaasumik illoqarfiup pissarsissunnissaa. Nakkutilliisut imeq Uummannami imeqarfimmi nioqqutissiarineqartoq atorneqarsinnaasunngortippaat, taamaalillunilu imeq imerneqarsinnaalerluni.

Pingaartumilli malugeqquneqarpoq tamanna imaanngitsoq imeq maqinneqarsinnaasoq imerneqarsinnaassasoq. Erngup aqqutai imerneqarsinnaasunngortitsinermut ilaanngillat, taamaattumillu erngup atorneqarnissaanik killilersuinerit allanngortinneqarnatik. Taamaattumik imeq kuuffimmiit maqinneqartoq suli imerneqarsinnaanani, atisanik errorsinermut atorneqarsinnaanani imaluunniit uffaatigineqarsinnaanngilaq.

Taamaattorli pitsaasumik nutaarsiassaqarpoq. Tassa Nukissiorfiit imeq Uummannami innuttaasunut atugassanngortitaa maanna Uummannami nioqqutissiarineqalermat. Taamaalilluni pilersuinerup qulakkeerneqarnissaa pitsaanerulersinneqarpoq. Tamatuma saniatigut Nukissiorfiit inuit namminneq imermut tankiutaat salillugit manna aallartippaat, tamanna imermik pilersuinerup nalinginnaasunngortinneqarnissaanut aqqut pingaartuuvoq. Naatsorsuutigineqarpoq aammattaaq aalisakkanut suliffissuit ullut tamaasa imermik suli annertunerusumik pilersorneqalernissaat. Suliniutit pillugit ingerlaavartumik malinnaasoqarsinnaavoq: https://www.nukissiorfiit.gl/kundeservice/uummannaq/

Manna aappassaanik imeqarfik pilersuisinnaasunngortinneqarpoq. Siullermik tamanna pimmat aqaguani misissukkat inerneri takkupput imeqarfimmit erngup annikitsumik uuliaqaleqqissimaneranik takutitsisut. Taamaalilluni pilersuisinnaaleraluarnera tunuartinneqarluni. Kingullermik pilersuititsilerneq ulluni marlunni misissuinerni imermi uuliartaqannginneranik tunngaveqarpoq. Maanna ulluni arfineq-marlunni misissuinerni imeq uuliartaqanngilaq. Aamma tamatuma saniatigut laboratoriami (misissuisarfimmi) angallattakkami qanittukkut apuunneqartumi ulluni marlunni misissuinerni erngup uuliartaqannginneranik takutitsipput. Tassa tamakku misissuinernit inernerit tunngavigalugit imeqarfik pilersuisinnaasunngortinneqarpoq.

Erngup pitsaassusia qulakkeerniarlugu aamma kingullermik pilersuisinnaalersinneqarneranit ilikkarneqartut  tunngavigalugit Nukissiorfiit toqqarpaat imeqarfimmit biilit imertaassuit imermik pajuttuisarneri tamaviisa pajugutigineqartinnagu misissuiffigineqartarnissaat. Taamaaliornikkut imermi pajugutigineqartumi uuliaqannginnera qulakkiissavarput. Tamannalu ingerlatiinnarallassavarput. Tamatumunnga ilutigitillugu imeqarfimmi imeq ullut tamaasa misissortarallassavarput.

Nukissiorfinnit pisortaagallartoq Claus Andersen-Aagaard imatut oqarpoq:
– Imeqarfiup pilersuisinnaalernera pitsaasuuvoq, tassami illoqarfiup imermik pilersorneqarnerata nalinginnaasunngortinneqarneratigut suliarput ajornannginnerulersippaa. Pingaartoq suliassarput tulliuttoq tassaavoq erngup aqqutaasa salilluarneqarnissaat. Nukissiorfiit erngup aqqutai assigiinngitsut immikkuualuttukkuutaarlugit kuutsitsivigisaqattaarlugit salippaat. Ullut tamaasa illoqarfimmi sumiiffinnit assigiinngitsuneersunik misissukkanit inernernik takkuttoqartarpoq. Imertartarfinnit, illunit, pisortat suliffeqarfiinit aamma suliffeqarfinnit allanit. Paasivarput salillugit imermik kuutsitsivigineqaqattaarnerat iluaqutaasoq, amerligaluttuinnarlunilu sumiiffinni imermi uuliaqarnera malunnarunnaarluni. Kisianni suli suliarput naammassinngilarput.

Nakkutilliisunit erngup atorneqarsinnaaneranik killilersuinerit massakkut imaapput:

Innuttaasunut imermik maqinneqarsinnaasumik aamma imermut tankiutilinnut, allatut nalunaartoqanngippat imeq taamaallaat anartarfiup kuutsinneranut aamma errortornermut atorneqassaaq, imeq uffarnermut, taamaalilluni eqqiaanermut imaluunniit erruinermut atorneqarsinnaanngilaq.

Apeqquteqartoqarusuppat attaveqarfigineqassaaq: nukissiorfiit@nukissiorfiit.gl