.jpg?w=1920&sh=5369d)
Uummannami inuttaasunik ataatsimiititsineq
Nukissiorfiit tallimassaanik innuttaasunik ataatsimiititsitsipput inuillu 30-t missaat peqataapput Uummannami imermut tunngasoq malinnaaffiginiarlugu
Sapaatit akunneranni qaangiuttumi aammattaaq malunnaateqarluartumik siuariartoqarpoq Uummannami innuttaasut ulluinnarni inuuniarnerannik oqiliallatsitsisunik. Illoqarfiup ilaarujussuani imeq uffarnissamut, errorsinissamut, erruinissamut, anartarfinnik kuutsitsinissamut aamma eqqiaanissamut atorneqarsinnaanngortinneqarpoq. Sullittakkat imermik pajunneqartartut tankii imaariarlugit imermik imeqarfimmeersumik immerneqarput aamma misissugassaq misissorneqareerluni. Manna tikillugu sullittakkat imermik pajunneqartartunit 109-usunit 64-it nakkutilliisutut oqartussanit akuerineqarput imeq imerneqartussatut atorsinnaagaat, naatsorsuutigineqarpoq sinneri ulluni qaninnerni aamma taamatut nalunaarfigineqarnissaat. Imermit pajuttuisarneq sapaatit akunneranni 43-mi nalinginnaasunngussaaq.
Annertuumik sulisoqarpoq
– Assut ilungersorluta erngup nalinginnaasunngortinneqarnissaa anguniarlugu sulivugut, nunap immikkoortuani pisortaq Lars Hoffmeyer oqarpoq, taanna nunap immikkoortuani pisortaq Kjell Bergmann aamma imermik immikkut ilisimasalik Kenneth Larsen peqatigalugit ataatsimiigiartut apeqqutiginiagaannik akissuteqarnissamut piareersimapput.
– Manna tikillugu Nukissiorfiit Uummannami imermut tunngatillugu pisumut katillugit nalunaaquttap akunneri 6.250 missaaniittut atorpaat, Lars Hoffmeyer nangippoq. Misissugassanik 407-inik misissuivugut, erngup aqqutai imeq 6.000 kubikmeteri missaaniittoq atorlugu salippagut, tatsimilu imeqassusia uuttortarparput taamaallaallu 5 mm. missaannik imikinnerulersimavoq.
Apeqqutit
Apeqqutigineqarmat imeq minguitsoq qanoq aamma qaqugu pissarsiarineqarsinnaalissanersoq akissutigineqarpoq, misissukkat inernerisa takutikkaat malunnaateqarluartumik pitsanngoriartortoqartoq imermik kuutsitsilluni errortuinerit amerlasuut kingunerisaannik, naak suliaq tamanna pisariugaluaqisoq. Taamaattumik erngup aqqutani suli kuutsitsivigisarlugit errortorneqarnerat ingerlanneqarpoq-
Lars Hoffmeyerip nunap assinga takutippaa tassanilu takuneqarsinnaavoq sumiiffinni qanoq amerlatigisuni misissugassat misissorneqartut tulleriiaartumik ajunngitsumik inerneqarsimanera. – Nakkutilliisutut oqartussaasut taakkua tassaapput akuersissuteqartartut, erngup imerneqartussatut atorneqarsinnaaneranut kisianni isumalluarpugut, tassami misissukkat inerneri pitsaasuummata, Lars Hoffmeyer oqarpoq.
Apeqqutigineqarpoq Nukissiorfiit qanoq iliorniarnersut maannakkut qerinnarsinerani aamma imiisivinni aqqaneq marluusuni imeq qerisalermat. Tamatumunnga akissutigineqarpoq imiisiviit unnukkut arfineq marlunniit eqqunneqartartut aqaguanilu qulinngortinnagu anninneqartarlutik. Taamaattorli imiisiviit marluk oqorsarneqarput taamaalillutik qerisinnaanatik, taamaattumik ulloq unnuarlu imermik imerneqartussamik pissarsisoqarsinnaajuarluni.
Innuttaasunit ataatsimiititsineq naggaserlugu Lars Hoffmeyer innuttaasunut qujassuteqarpoq Nukissiorfinni sulisut illoqarfimmi inuit angerlarsimaffiini tikilluaqquneqartuarmata, imermik misissugassamik qalusiartoraangata aamma errortuiartorlutik takkukkaangata.
