Anorisaammik ajortittoorneq

Nukissiorfiit Sisimiuni misilittaaffiani anorisaatit marluusut aappaat unittooqqippoq

Anorisaat pineqartoq aappassiaanik ajortittoorpoq siullermi tamanna pivoq januaarimi 2019-imi, tassani suluusaa ataaseq katattoorpoq. Juuni suluusat pingasut tamarmik taarserneqarput. Tamanna pivoq suliffeqarfimmit Force Techology-mit attuumassuteqanngitsunik misissuisoqareernerata kingornatigut. Tamatuma saniatigut sananeqarsimanerini pitsanngorsaasoqarpoq taakkua ajortittoortoqaqqinnissaa pinaveersaartinniarlugu. Ajoraluartumik anorisaat nioqqutissiortumit Solid Wind Power-imeersoq unittoorpoq, tamatumani pissutaavoq suluusap qupisimanera.

– Soorunami tamanna pisoq assorsuaq uggoraarput tassami kinaluunniit eqqarsanngilaq anorisaat taanna aamma ajortittooqqissasoq. Tamatumunngali iliutigitillugu immitsinnut saammarsarpugut anorisaat Sisimiuni misilittaaffitsinni napparsimagatsigut, Claus Andersen-Aagaard, pisortaanerugallartoq oqarpoq, itisiliillunilu:
– Misilittaavik sanaartorfigineqanngitsumi inissisimavoq. Soorunami pingaarnerpaajuvoq ajortittoortoqarnerani inunnik ajoqusertoqarsimannginnera. Tamatuma saniatigut ajortittoornerit pilersuinermik qulakkeerinninnermut sunniuteqarsimanngillat. Anorisaatinik taakkorpianik misilittakkavut pitsanngitsut soorunami pilersaarusiornitta ingerlaqqinneranni nalilersuinitsinnut ilaassapput, tassa nunatsinnik qanoq nukissiamik ataavartumik pilersuinissarput eqqarsaatigalugu.

Nukissiorfiit ilisimatitsissutigaat anorisaatit aappaat misilittaavimmiittoq, Viking Wind-ip nioqqutissiarisaa suli ingerlavoq. Kisitsisit aamma misilittakkat tassanngaanneersut taamatuttaaq nukissiamik ataavartumik pilersuinermik pilersaarusiornerup ingerlaqqinnerani ilanngunneqassapput.

Misilittaavik pillugu paasissutissat:
Anorisaatit nukissiamik ataavartumik pissarsiffigineqarsinnaasunut allanut ilaallutik, Kalaallit Nunaanni nunaqarfinnik nukissiamik nioqqutissiornermut minguinnerusumik nioqqutissioriaatsimut allanngortitsinermut ilaassapput – milittaaneq Nukissiorfiit siunissamut iliuusissatut pilersaarutaanut ilaavoq, tassa sumiiffinni tamani tamanna ajornartinnagu 2030-imi sapinngisamik nukissiamik atuinissaq anguniarlugu.

Suliniut tamarmik ingerlanneqarpoq KTI-Sisimiut suleqatigalugu atuarfiup atuartuinik atuartitsinerminnut atatillugu anorisaatinik ingerlatsineq atorniarpaat. Taamatuttaaq DTU ARTEK teknikimik ilisimasaqarnermik aamma sajuppilunnernik uuttortaanermi ikiuupput.