Biilinik innaallagiatortunik piginnittunut nutaarsiassaq nuannersoq

Piffissami ungasinngitsumi Nukissiorfiit apeqqutinik akisassanik immersugassamik Nuummi innaallagiatortunik biiliutilinnut aamma hybrid-nik biiliutilinnut tamanut nassiussissapput. Misissuinerup takutissavaa ullumikkut innaallagiatortunik biiliutillit biilitik qanoq sarfalersortarneraat, aamma qanoq siunissami tamatuma ingerlattarnissaanut kissaateqarnersut.

Ukiuni kingullerni Nunatsinni illoqarfiit pingaarnersaanni biilit innaallagiatortut aamma hybrid-biilit untriitilinnik arlaqartunik amerleriarsimapput. Apeqqutinik akisassanik immersuinermi anguniarneqarpoq 2021-p aallartilaarnerani nutaanik arlalinnik sarfalersuutissanik nappaasoqartussaanera, tassani sullitat mobili iluaqutigalugu ilaatigut malinnaasinnaassallutik atorneqanngitsumik sumi sarfalersuuteqarnersoq, tamannalu ilutigalugu sarfalersornertik akilersinnaallugu.

Apeqqutinik akisassanik immersuinermi paasissutissat nutaanik sarfalersuutinik sumi nappaasoqarnissaanut pisariaqartitsinermik takutitsissapput.
– Maannamut misilittakkatta takutippaat qaqugukkut atorneqarunnaartumik sumi sarfalersuuteqarnersoq paasiuminaatsuusarnera. Tamanna ilutigalugu inissianik peqatigiiffiit, inissianik attartortut aamma Nukissiorfiit quleriiaartunik inissiaqarfinni sarfalersuutinik aqutsisarnissaat ajornakusoormat. Apeqqutinik akisassanik immersuinikkut sullitat pisariaqartitaat paasissavarput, taamaaliornikkut nioqqummik tamakkuninnga unamminartunik aaqqiisumik neqeroorsinnaalissaagut, taamaalillutalu innaallagiatortunik biiliutilinnut aamma hybrid-nik biiliutilinnut tamanna ajornannginnerulersissallutigu, Kasper Dahl, Nioqquteqartarnermut aamma Avammut Nioqqutissiornermik Ineriartortitsinermut immikkoortortaqarfimmi pisortaq, oqaluttuarpoq.

Apeqqutinik akisassanik immersorneqartussatugassaq Facebookimiippoq Nukissioorfiup quppernerani.

Biilinut innaallagiatortunut Nuummi 2016-imi sarfalersuutit 13-it misiligutitut napparneqarput. Ataaseq akeqanngitsumik sarfalersuut, Nuuk Centerimi pilertortumik sarfalersuut aamma inissiaqarfiit assigiinngitsuni 12-it eqqaannut napparneqarlutik. Nuummit misilittakkat nunami illoqarfimmi allani sarfalersuutinik atuutilersitsinermi atorneqassapput.