Innaallagissamik aamma imermik pilersuineq nakkutigineqarpoq

Nukissiorfiit upalungaarsimanermut pilersaaruteqarpoq pitsaalluinnartumik, tamatuma qulakkiissavaa Nunatsinni Covid-19-imik tunillaassuisoqarnerani innuttaasut aamma suliffeqarfiit innaallagissamik aamma imermik aalajaatsumik pilersorneqartuarnissaat.
-Pisoq ilungersunartorujussuartut isigaarput malinnaaffigiuarlugulu. Nukissiorfiit pilersuisutut suliffeqarfittut innuttaasunut pingaaruteqarluinnartuuvoq. Taamaammat piareersimalluinnarluta upalungaarsimanermut pilersaarummik ineriartortitsisimavugut, tamatumani takorluukkat assigiinngitsut pillugit iliuusissatut pilersaarutinik imaqartumik sulisut Covid-19-imik nalaataqassagaluarpata. Virusimik tunillaassuisoqarnerata kinguneranik pilersuinerup ingerlatiinnarneqarnissaa qularutigineqassanngilaq. Innuttaasut taamaattumik pilersorneqarnissaminnut toqqissisimassapput, Nukissiorfinni pisortaagallartoq Claus Andersen-Aagaard oqarpoq.

Nukissiorfiit angalanissamut politikkertik sakkortusivaat tunillaassuisoqaratarsinnaanera annikillisarniarlugu: Kalaallit Nunaannut tassanngaanniillu angalanerit tamarmik unitsinneqarput, pilersuinermillu ajornartoortitsilernermik pissuteqartumik Kaaallit Nunaanni taamaallaat angalanerit inerteqqutaanatik. Nukissiorfiit soorunalimi Peqqinnissaqarfimmi Oqartussaasut innersuussutaat aammattaaq malippaat.