.jpg?w=1920&sh=5369d)
Mingutsitsinngitsumik nukissiaq siaruariartorpoq
Naalakkersuisut nukissiuutinut imermillu pilersuinermut immikkoortumut pilersaarutaanut atatillugu sumi tamani pisinnaaffiani nukissiamik nungutsuitsumik pilersuinissamik piviusunngortitsiniarneq Nukissiorfiit nangittumik sulissutigaat.
Tassunga atatillugu Uummannami timersortarfissuup qaliani seqernup nukinganik innaallagissiuutinik ikkussisoqarlunilu atulersitsisoqarpoq. Taamattaaq nunaqarfinni Ammassivimmi Ikerasaarsummilu ikkussivinnut seqernup nukinganik innaallagissiuutinik ikkussisoqarlunilu atulersitsisoqarpoq, taakkunanissaaq batterit atorlugit nukissamik katerisivimmik ivertitsisoqarpoq. Taamaaliornikkut atuisartut nukissiamik nungutsuitsumik piffissami sivisunerusumi atuisinnaanerat, innaallagissiorfimmilu motoorit akunnerit ingerlaffiisa misinnartumik annikillisinneqarnerat qulakkeerneqarpoq.
Piffinni taakkunani Nukissiorfiit misilittakanik pitsaasunik pissarsipput, tamatumalu ilaatigut nassatarisaanik innaallagissiorfinni motoorit ingerlaneri 30-40 procentinik appariarput. Maannakkuugallartorli nunaqarfinni pilersuineq qanoq annertutigisoq seqernup nukinganit siunissami matuneqarsinnaanersoq nalilissallugu suli siusippallaarpoq. Taamaammat Nukissiorfiit 2021-mi nukissiuutinit taakkunannga annertunerusumik misilittagaqalernissartik qilanaarilereerpaat.
Nukissiorfiit seqernup nukinganik innaallagissiuutinik ikkussuinertik ukiumi nutaami Ittoqqortoormiini, Qeqertarsuatsiaani Qeqertanilu nangissavaat. Taakku ukioq manna ikkussuunneqareersussaagaluarput, coranalli atuunnera pissutigalugu kinguaattoorput.
Piffiit taakku saniatigut aamma Eqalugaarsunni seqernup nukinganik innaallagissiuutinik batteriinillu nukissiamik katersivinnik ikkussuinissaq pilersaarutigineqarpoq. Tamanna innaallagissiorfiup 2021-mi tamakkiisumik nutarterneranut atatillugu pissaaq.
Suliniutit taakku aamma avatangiisunut iluaqutsiissapput, taakkumi uuliamik annikinnerusumik atuineq seqernullu nukinganik annertunersumik pilersuineq nassatarissavaat. Aappaagu silagikkumaarnissaa Nukissiorfiit neriuutigaat – taamaalilluni seqernup nukinganik innaallagissiuutinit nukissiaq sapinngisamik annertunerpaasinnaaqqullugu.
Uulia annikinnerusoq nukissiaq mingutsitsinngitsoq annertunerusoq
Seqernup nukinganik innaallagissiuutinik suliniummi katillugit innaallagiaq 338 Kwp pilersinneqassaaq, ukiumullu 300.000 Kwh sinnilaarlugit tunisassiornissaq naatsorsuutigineqarpoq. Tamanna avatangiisit ukiumut solaarimik 100.000 literit angullugit annertussusilimmik sunnerneqartannginneranik naleqarpoq, illoqutigiillu 40-t missaasa ukiumut atuisarnerattut annertussuseqarluni.
Suliniutit naammassippata Nukissiorfiit paasissutissanik misilittakkanillu inoqarfinni minnerusuni piujuaannartitsinermik aallaaveqartumik pilersuinerup nangittumik sulissutiginissaanut atugassanik katersuissapput. Taamaaliornikkut Nukissiorfiit aamma nukissap nungutsuitsup issittumi pissutsinut eqqummaarinnittumik ineriartoreqqinneqarneranut aqqutissiuussisuussapput.
Suliniutit Nukissiorfiit pisortaanerisa nukissianut ataavartunut immikkoortitaanni aningaasanik ukiumoortumik immikkoortinneqartut aqqutigalugit aningaasalersorneqarput – taamaalillutillu aamma Naalakkersuisut immikkoortumut pilersaarutaannik piviusunngortitseqataallutik.
