Nukissiorfiit ESANI A/S-llu suleqatigiinnerisa eqqakkat innuttaasunut suliffeqarfinnullu iluaqutinngorlugit ungasianit kiassarninngortissavaat

Nukissiorfiit kommunillu ataatsimoortumik eqqakkagassalerinermik ingerlatseqatigiiffiat ESANI A/S Sisimiuni Nuummilu eqqakkanik ikuallaavissanit kiassap pilersinneqartup ungasianit kiassarnermut atorneqarnissaa pillugu isumaqatigiissuteqaqqammipput.

Taamaalilluni suleqatigiinnerup qitiusumik eqqakkanik ikuallaaviit ilimagineqartutut 2022/23 atulerpata, Kalaallit Nunaanni eqqakkanik passussisarnermi ullut nutaat aallartinnerat taamaalilluni malunnartippaa.

Sisimiuni Nuummilu eqqakkanik ikuallaaviit nutaat muteerniusullu maanna atorneqartunit avatangiisinut qajassuarnerujussuupput, taamatullu aamma ikuallaavinnut allanut EU-miittunut avatangiisinut qaffasissumik piumasaqaatinut naammassinnissallutik. Ikuallaaviit ulloq unnuarlu eqqakkanik 60 tons missaannik passussisinnaassapput.

Sisimiuni ikuallaavik nunatsinnit tamanit eqqagassanik tigooraasussaasoq, Nuummi ikuallaavik taamaallaat Nuup illoqarfianit eqqakkanik pilersorneqassaaq.

Eqqakkanik ikuallaavinnit kiassarneq pilersinneqartoq Sisimiuni Nuummilu innuttaasunut suliffeqarfinnullu ungasianit kiassaatitut atorneqassaaq, taamaalillunilu ungasianit kiassaatit aqqutaat annertusarneqassapput, ilutigisaanillu eqqakkat pisuussutitut iluaqutinngortinneqassallutik

Eqqakkat umiarsuarnit tikiussuunneqassapput

Ikuallaaviit nutaat atulerpata, ikuallaaviit pisoqqat nungullarsimasullu kiisalu nunaqarfinni ikuallaaviit matuneqassapput.

Taarsiullugu eqqakkat katersorneqartarnerat aaqqissuunneqassaaq, poortorneqartalerlutik ikuallaavinnullu nutaanut assartorneqartalerlutik, taamaaliornikkullu illoqarfiit nunaqarfiillu ilaanni eqqakkat katersorneqartarnerisa kingunerannik unammillernartut aaqqinneqassapput.

Eqqakkanik ajornartorsiutit aaqqinneqarsinnaalernerat kiisalu eqqakkat pisuussutitut atorluarneqarsinnaalernerat Nukissiorfiit pisortaata Kaspar Mondrupip soorunami nuannaarutigaa.
– ESANI A/S suleqatigalugu eqqakkat passunneqartarneranni unammillernartitanik aaqqeeqataanerput, taamaalillutalu eqqakkani nukissiap pilersinneqartup avataanit kiassaatitut iluaqutigineqalernissaa pitsaavoq, Kaspar Mondrup oqarpoq.

BESANI A/S-mi siulersuisut siulittaasuat Lars Møller-Sørensen ESANI A/S-milu pisortaq Frank Rasmussen tapersiipput:
– Nunatsinni eqqakkanik ajornartorsiutit muteerniusumik pisariitsumillu aaqqinneqarsinnaalernerat nuannaarutigaarput. Tamanna illoqarfippassuarni nunaqarfippassuarnilu maannakkutut eqqakkanik passussillunilu katersisarunnnaartussani malugineqarsinnaalissaaq, qitiusumilu eqqakkanik ikuallaavinnit kiak pilersinneqartup iluaqutigineqarsinnaalernerata aaqqiineq suli pitsaanerulersippaa.

Peqatigisaanik suleqatigiinnerup Naalakkersuisut nukissiornermut imermillu pilersuinermi immikkoortumut pilersaarutaanni anguniakkanik marlunnik kivitsinera Nukissiorfini ESANI-milu annertuumik iluarisimaarneqarpoq.

Tassa ataatsimoortumik kiassarnermik pilersuineq orsussamik imerpalasumik atuinermik annikillisaanermik siunertaqartumik annertusarneqarnissaa kiisalu eqqakkat pisuussutitut isigineqarnissaat taamatullu eqqakkanik ikuallaavinnit kiammik sinneqartoorut ilaatigut ungasianit kiassaatitut atorlugu iluaqutinngortinneqarnissaa.

Taamattaaq isumaqatigiissutip aamma Naalakkersuisut eqqakkanik passussineq pillugu iliuusissatut pilersaarutaanik ikorfartuisuuvoq, taamaalillunilu Kalaallit Nunaannik minguinnerusumik, avatangiisinut qajassuussinerusumik piujuartitsinerusumillu pilersitseqataalluni.

Paasissutissat erseqqinnerusut pillugit Nuummi Pisortaqatigiit allatseqarfianni pisortaq, Sune Tougaard oqarasuaatikkut 349589 mailikkulluunniit suto@nukissiorfiit.gl Imaluunniit

ESANI A/S-p pisortaa, Frank Rasmussen oqarasuaatikkut 564669 mailikkulluunniit frra@esani.gl attavigikkit